უკრაინული მაღაზიათა ქსელი OnePrice საქართველოს ბაზარზე შემოვიდა და ორი თვის განმავლობაში თბილისში 7 ფილიალის გახსნა მოასწრო.
როგორც “კომერსანტთან“ OnePrice-ის მარკეტინგის დეპარტამენტის ხელმძღვანელმა მაია ჯანგულაშვილმა განაცხადა, საქართველოში OnePrice-ს პირველი ფილიალი 2023 წლის 12 იანვარს, ჭავჭავაძის ქ 52-ში გაიხსნა.
OnePrice საქართველოში გაფართოებას განაგრძობს და სულ მალე აღმაშენებლის გამზ. 154-ში კიდევ ახალი, რიგით მერვე OnePrice-ს ფილიალი გაიხსნება. მაღაზიათა ქსელი რეგიონებში შესვლასაც განიხილავს.
„თუ რეალურად, ბიზნესგეგმით გათვალისწინებულ შედეგებს მივაღწევთ 3-დან -6 თვის განმავლობაში, აუცილებლად კიდევ და კიდევ გავიზრდებით და მალე არამარტო თბილისში, არამედ საქართველოს სხვა ქალაქებშიც ნახავთ ჩვენი ლოგოს ქვეშ გახსნილ მაღაზიებს“, აცხადებს მაია ჯანგულაშვილი.
რაც შეეხება პროდუქციას, რომელიც OnePrice-ს ევროპიდან და აზიიდან შემოაქვს, ყველა სეგმენტზეა გათვლილი.
„იქიდან გამომდინარე, რომ ჩვენს მაღაზიაში 10 000-მდე სახეობის პროდუქციაა, თითქმის ყველა სეგმენტზეა გათვლილი, თუმცა პროდუქციის უმეტესი ნაწილი დაბალი და საშუალოშემოსავლიანი მომხმარებლისთვისაა. პროდუქცია შემოგვაქვს სხვადასხვა ქვეყნებიდან, როგორც ევროპიდან, ასევე აზიიდან, ვახორციელებთ პირდაპირ იმპორტს, თუმცა ადგილობრივ დისტრიბუტორებთანაც ვთანამშრომლობთ“, - აცხადებს OnePrice-ის მარკეტინგის დეპარტამენტის ხელმძღვანელი.
დღეისათვის OnePrice პროდუქციის რეალიზაციას ახდენს მაღაზიებიდან, თუმცა სამომავლოდ დაგეგმილია, როგორც ონლაინ გაყიდვების დამატება, ასევე მიტანის სერვისის კომპანიებთან თანამშრომლობასაც.
„ქართული ბაზარი, ვფიქრობ, საინტერესო ბაზარია უცხოური კომპანიებისთვის, თუნდაც ქვეყანაში უსაფრთხოების კუთხით და ბიზნესის კეთების მხრივ გამარტივებულია პროცესები, რაც ხიბლავს ზოგადად უცხოელ ინვესტორებს“, - განმარტავენ OnePrice-ში.
დღესდღეობით OnePrice-ს მიერ საქართველოში უკვე რამდენიმე მილიონიანი ინვესტიციაა განხორციელებული.
„ეს იყო როგორც ინვესტორების კაპიტალი, ასევე საბანკო კრედიტი, კონკრეტულად კი საქართველოს ბანკის, რისთვისაც ვისარგებლებთ შემთხვევით და გადავუხდით მადლობას“, - აცხადებს OnePrice-ის მარკეტინგის დეპარტამენტის ხელმძღვანელი.
ამჟამად OnePrice თბილისში წარმოდგენილია შემდეგ მისამართებზე: ი.ჭავჭავაძის N52, თ.ერისთავის N1, ვაჟა-ფშაველას გამზირი 64ა, რუსთაველის გამზირი N16, ქეთევან წამებულის 96, 17 შინდისელი გმირის ქ.N4, დიდი დიღომი მეფე მირიანის 86.
ცნობისათვის, OnePrice უკრაინული ბრენდია და მისი როგორც ბრენდის ისტორია იწყება 2018 წლიდან კიევში. უკრაინაში კომპანიას 100-მდე მაღაზია აქვს. ასევე კომპანია საქართველოს გარდა, შევიდა რუმინეთის ბაზარზეც.