ონლაინ აზარტული თამაშებისთვის სანებართვო მოსაკრებელი წესდება. თუ დღეს მოქმედი კანონმდებლობა მიწის სამორინეს, ან სათამაშო აპარატის სალონის ნებართვის ფარგლებში ონლაინში თამაშობების მოწყობასაც ითვალისწინებდა, ამიერიდან ამ მიმართულებების გამიჯვნა მოხდება. თუ ფიზიკური სამორინეს მოწყობისთვის თბილისში სანებართვო მოსაკრებლის ტარიფი 5 მლნ ლარია, ონლაინ საქმიანობაზე  მინიმალური განაკვეთი,  100 000 ლარი წესდება.

სანებართვო პირობების დარღვევისთვის ჯარიმა 20 ათასი ლარ, სანებართვო მოსაკრებლის გადაუხდელობისთვის კი  50 ათასი ლარი იქნება. სანებართვო პირობებს  შემოსავლების სამსახური  სისტემატურად, წელიწადში რამდენჯერმე შეამოწმებს. ყოველ დარღვევაზე გავრცელდება ახალი ჯარიმა.

როგორც „კომერსანტთან“ ფინანსთა მინისტრის მოადგილემ მიხეილ დუნდუამ განაცხადა, ახალი საკანონმდებლო ინიციატივა გამომდინარეობს 12- პუნქტიანი გეგმიდან. „მანივალი“ (ევროპის საბჭოს სტრუქტურა) ითვალისწინებს სათამაშო ბიზნესის სრული ლიცენზირებას.

„ნებართვას დაექვემდებარება ყველა, ყველა სახის აზარტული მიწოდება, როგორც ონლაინი, ასევე ხმელეთის, ანუ ფიზიკური ობიექტები. გაიწერება სანებართვო საკითხები და ეს ყველაფერი დარეგულირდება არა უწყებრივ, არამედ კანონის დონეზე. ეს არის საკმაოდ წინ გადადგმული ნაბიჯი. რაც შეეხება ჯარიმებს, მათ არსებითი მოცულობა არ აქვს, დაბეგვრის ძირითადი წნეხი მოდის გადასახადებზე, რომელიც ჯერ კიდევ 2021 წლის ცვლილებებით გაიზარდა. მოსაკრებლის მაჩვენებლები არის ნორმალური, არის შესატყვისი და იმ მასშტაბის, რა საქმიანობასაც ეწევა სათამაშო ბიზნესი“, — აცხადებს დუნდუა.

მინისტრის მოადგილე აცხადებს, რომ აღნიშნული ცვლილებების მიღება ფისკალური ეფექტის თვალსაზრისით არ ხდება.

„მისი ფისკალური ეფექტი მაღალი არ იქნება. იქნება უფრო დაბალი, შეიძლება მთელი დაბეგვრის მოცულობის  3%-ზე დაბალი იყოს. ამას არა ფისკალური დატვირთვა, არამედ სანებართვო-სალიცენზიო დატვირთვა აქვს და ფულის გათეთრების და ტერორიზმთან დაფინანსების წინააღმდეგ ღონისძიებების კუთხით წინ გადადგმული ნაბიჯია. ის ამჯერად ფისკალურ ეფექტზე გათვლილი არ არის, რადგანაც ფისკალური კუთხით გარკვეული ნაბიჯები ჩვენ 2021 წელს უკვე გადავდგით.

წელს სათამაშო ბიზნესიდან, როგორც გადასახადებიდან, ასევე მოსაკრებლის ჯამი უნდა იყოს დაახლოებით 600 მლნ ლარზე მეტი, რაც ძალიან კარგი მაჩვენებელია ფისკალური თვალსაზრისით და მომავალ წელს იქნება უფრო მეტი. საგადასახადო ცვლილებებმა თავისი ფისკალური ეფექტი უკვე გამოიღო“, —  განმარტავს დუნდუა.

კითხვაზე, ონლაინ თამაშებისთვის სანებართვო მოსაკრებლის დაწესება ხომ არ გამოიწვევს ბაზრის მოთამაშეების შემცირებას, მინისტრის მოადგილე პასუხობს, რომ ონლაინ აზარტული თამაშების განვითარება საქართველოს პრიორიტეტი არ არის

„თუ ზოგიერთი ოპერატორი გადაწყვეტს, რომ სანებართვო პირობების მიღება არ სურს და ამიტომაც დახურავს თავის ბიზნესს, ჩვენ ვერაფერს გავაკეთებთ და გულიც არ დაგვწყდება. იმ თვალსაზრისით, რომ სანებართვო პირობებს უნდა დაემორჩილოს ყველა. ეს ყველაფერი კეთდება იმისთვის, რომ დაიცვას როგორც მომხმარებელი, ისე სახელმწიფო თაღლითობისა და ფულის გათეთრების რისკისგან. ამის თუ ვინმეს ეშინია, მაშინ შეუძლიათ დაკეტონ თავისი ბიზნესი. თუ შემცირდება სათამაშო ბიზნესში შემოსავლები, გაიზრდება სხვა სფეროში. ეკონომიკურ/მწარმოებლური კუთხით უფრო კარგად მოქმედებს ეკონომიკურ ზრდაზე სხვა სფეროში ფინანსური ნაკადები, ვიდრე სათამაშო ბიზნესი - ეს დამტკიცებული ფაქტია.

ონლაინ აზარტული თამაშების განვითარება საქართველოს პრიორიტეტი არ არის. თუ სათამაშო ბიზნესის შემცირების ხარჯზე სხვა დარგები უფრო მეტად განვითარება, გაიზრდება და სამომხმარებლო ხარჯები სულ სხვა მიმართულებით იქნება მიმართული, ეს ეკონომიკას უფრო გაზრდის“, - აცხადებს ფინანსთა მინისტრის მოადგილე.