მიმდინარე წელს ონლიან-შოპინგი საკმაოდ აქტუალურია, ქართველ მომხმარებლები პროდუქტის, საყოფაცხოვრებო ნივთების თუ ტანსაცმლის შესაძენად, ხელმისაწვდომი ფასიდან გამომდინარე, ხშირად მიმართავენ თურქულ ონლაინ-პლატფორმა „ტრენდიოლს“.
„ნეტგაზეთის“ მიერ შემოსავლების სამსახურიდან გამოთხოვილი ინფორმაციის თანახმად მიმდინარე წლის 10 თვეში ონლაინ გამოწერების რაოდენობა 2021 მთლიანი წლის გამოწერებს 5-ჯერ აღემატება, სიაში ლიდერობს თურქეთი, რომლის მონაცემებიც აშშ-სა და ჩინეთის მონაცემებს საგრძნობლად აჭარბებს.
როგორ მოქმედებს ონლაინშოპინგის მსგავსი გააქტიურება ადგილობრივ ბიზნესზე და რამდენად ადეკვატურია სამასლარიანი განბაჟების ზღვარი. ამის შესახებ „კომერსანტთან“ ეკონომისტმა ოთარ აბესაძემ ისაუბრა. მისი თქმით, ონლაინ გამოწერები მცირე და საშუალო ბიზნესის ძლიერ წახალისებას ახდენს. ამასთან აბესაძე, ამბობს რომ აუცილებელია განბაჟების ზღვარი შეიცვალოს.
„დღეს, თანამედროვე რეალობაში, დაწყებული სათამაშო დისკებით, კომპიუტერებით, მობილური ტელეფონების აქსესუარებით, ტანსაცმლით თუ ა.შ, ყველაფრის გამოწერაა შესაძლებელი. ამით მცირე ბიზნესმა, ფაქტობრივად, ერთგვარი სტიმული შეიძინა და ეს ძალიან კარგია.
განბაჟებაზე სამასლარიანი ზღვარი რადიკალურად უნდა გაიზარდოს, რადგან ქვეყანაში ინფლაციაა და 300 ლარიანი ზღვარი თითქმის 100$ - იან ნიშნულზეა, შესაბამისად, ეს ზღვარი სრული სიგიჟეა,“ - აცხადებს ოთარ აბესაძე.
ოთარ აბესაძის თქმით, ონლაინ-შოპინგმა მიკრო-ბიზნესი საგრძნობლად გააქტიურა და მისთვის მიუღებელია, ამ სფეროს რაიმე რაგულაციით შეზღუდვა.
ადამიანი პირადი მოხმარებისთვის იყენებს გამოწერას და დემოკრატიულ წყობილებაში ძალიან ნორმალურია, მქონდეს არჩევანი, გამოვიწერ, ადგილზე ვიყიდი, თუ რას ვიზამ,
რამდენიმე ასეული ადამიანია ჩემ გარშემო, რომლებიც იწერენ პროდუქციას და ყიდიან, ადამიანები შევიდნენ მიკრო-ბიზნესში, რითაც გაჩნდა თვითდასაქმების იდეალური პუნქტები. როგორც წესი ბაზრის მიერ დარეგულირებული ფასი არის იდეალური, მე თუ დღეს ჩემით შემიძლია გამოვიწერო დისკი FIFA 23 165 ლარად , ან გამოწერილი ვიყიდო 180 ლარად, რატომ უნდა გამიძვირდეს“, - აღნიშნა ოთარ აბესაძემ.
აბესაძის თქმით, როდესაც პროდუქტი საქართველოში შემოაქვთ, პროდუქტის თვითღირებულებას აძვირებს ტრანსპორტირების, იჯარის, დასაქმებული ადამიანების ხელფასების ხარჯები, შესაბამისად ბიზნესის დაუწერელია კანონია, რომ მომხმარებელს უნდა ჰქონდეს ალტერნატივა.
„საქართველოში როცა შემოაქვთ, ფულს იხდიან იჯარაში, გადასახადებში და თავისთავად ეს აძვირებს მომსახურებას და პროდუქტს. როდესაც ბაზარზე არის ალტერნატივა, რატომ არ უნდა აირჩიონ. მაგალითად ფლეისთეიშენის დისკი FIFA 23 ნებისმიერ მაღაზიაში ღირს 230 ლარი, რომ გამოწერო 165 ლარი იქნება, ადამიანს, რომელიც ამ ტიპის სათამაშო სტილით არის დაკავებული, მას ურჩევნია დისკი დაბალ ფასში მიიღოს.
ამის კარგი მაგალითია „ამაზონი“, „ტრენდიოლი“ და სხვა, თურქეთში რომ რამე „ტრენდიოლიდან“ გამოიწერო არ იბეგრება, ამერიკელმა რომ „ამაზონზე“ რამე გამოიწეროს არ იბეგრება, საქართველოს არ აქვს მაგის ჰაბი, რომ ჰქონდეს მაგის ფუფუნება, მას უწევს კონტინენტებიდან რაღაცების გამოწერა. დღეს „ტრენდიოლიდან“ შოკოლადის გამოწერა უფრო იაფი ჯდება, ვიდრე აქ ყიდვა. შეიძლება აქ ყიდვით სტიმულს უკეთებ ბიზნესს, რომელიც გადასახადს პატიოსნად იხდის, მაგრამ ბიზნესს აქვს დაუწერელი კანონი იმაზე, რომ ალტერნატივა ყოველთვის უნდა არსებობდეს, წინააღმდეგ შემთხვევაში ჩნდება მიწისქვეშა ალტერნატივები. ამიტომ ჩემი აზრით განბაჟების ზღვარი უნდა აიწიოს 1000 დოლარამდე, რადგან ამ გამოწერებმა ბევრი მიკრობიზნესი წაახალისა და სამუშაო ადგილები შექმნა“, - აღნიშნა ოთარ აბესაძემ.
თაკო კვაჭანტირაძე