კონკურენციის ეროვნულმა სააგენტომ, 2022 წლის 1 ნოემბრიდან 31 იანვრის ჩათვლით, მომხმარებელთა უფლებების დაცვის მიმართულებით, 122 განაცხადი მიიღო. აქედან 70 საქმის შესწავლა დაიწყო, 14 საქმეზე სააგენტომ პირობითი ვალდებულების აღების შესახებ მოვაჭრეებთან შეთანხმება გააფორმა, მიღებული იქნა 1 გადაწყვეტილება დარღვევის არსებობის და 1 - დარღვევის არარსებობის შესახებ.
როგორც რადიო „კომერსანტის“ ეთერში მომხმარებელთა უფლებების დაცვის დეპარტამენტის უფროსის მოადგილე მარიამ შაიშმელაშვილმა განაცხადა, შემოსული განაცხადებისა და ზარების 80%-ზე მეტი დისტანციურ ვაჭრობას ეხება, დანარჩენი - ადგილზე ვაჭრობას.
„გამოდის, რომ კანონის შესაძლო დარღვევები უფრო დისტანციური ვაჭრობის დროს გვაქვს. დიდია მომართვიანობა ცხელ ხაზზე, მათ შორის მოვაჭრეების. ჩვენთვის ძალიან მნიშვნელოვანია, რომ მოვაჭრე იყოს დაინტერესებული, რომ მან და მომხმარებელმა კანონის დაცვით იურთიერთონ,“ - აცხადებს შაიშმელაშვილი.
მისი თქმით, კანონის მიხედვით, ონლაინ ნაყიდი ნივთის დაბრუნება 14 დღის განმავლობაში, ხარვეზის არარსებობის შემთხვევაშიც კი უპირობოდაა შესაძლებელი. მთავარია, რომ მას მოხმარების კვალი არ ეტყობოდეს.
რაც შეეხება სააგენტოსთვის მიმართვის პროცედურებს, განაცხადის შევსება შესაძლებელია როგორც ონლაინ, ისე სააგენტოში განცხადების ჩაბარებით. საქმის განხილვა კი 1-დან 3 თვის ვადაში მოხდება. მისი თქმით, მთავარი სირთულე იმ მოვაჭრეებთან დაკავშირებაა, ვისაც სავაჭრო ვებგვერდსა და სოციალურ ქსელში საკონტაქტო ინფორმაცია მითითებული არ აქვთ.
„1-დან 3 თვის პერიოდი საჭიროა იმისათვის, რომ მოვიპოვოთ მტკიცებულებები და მოვაგროვოთ საჭირო ინფორმაცია. განაცხადს განიხილავს სააგენტო, შეაფასებს არის თუ არა სრულყოფილი, შემდეგ ვმსჯელობთ - განცხადებაში აღნიშნული დარღვევა წარმოადგენს თუ არა მომხმარებლის უფლების დარღვევას. თუ დარღვევას აღმოვაჩენთ, ვუკავშირდებით მოვაჭრეს. სირთულეებთან არის დაკავშირებული იმ ონლაინ მოვაჭრეებთან კომუნიკაცია, ვისაც არ აქვთ მითითებული სოციალურ ქსელში ან სავაჭრო ვებგვერდებზე საკონტაქტო ინფორმაცია - ტელეფონი, ელექტრონული ფოსტა და მისამართი“, - აცხადებს მარიამ შაიშმელაშვილმა.