Reuters–ისა და Bloomberg–ის მონაცემებით, ნავთობის ექსპორტიორი ქვეყნების ორგანიზაციამ (OPEC) ევროკავშირს განუხადა, რომ სანქციების დაწესების ან ბოიკოტის გამოცხადების შემთხვევაში რუსული ნავთობის ჩანაცვლება „თითქმის შეუძლებელი“ იქნება.
მიიღე ინფორმაცია უფრო სწრაფად „კომერსანტის“ Telegram-ზე.
„სანქციების ან სხვა სახის შეზღუდვების შემთხვევაში, რომლებიც შეიძლება რუსულ ნავთობს შეეხოს, პოტენციურად დღეში 7 მილიონი ბარელი დააკლდება ბაზარს“, – განაცხადა OPEC–ის გენერალურმა მდივანმა მოჰამად ბარკინდომ, წერს Reuters დოკუმენტის ასლზე დაყრდნობით.
„მოთხოვნის მიმდინარე პროგნოზის გათვალისწინებით, თითქმის შეუძლებელი იქნება ასეთი მოცულობის დანაკარგების ჩანაცვლება“, – მიმართა ბარკინდომ ევროკავშირს.
ევროკავშირის ნავთობის იმპორტის 25%–ს რუსეთი უზრუნველყოფს, თუმცა მანამდე გაერთიანებამ რუსული ქვანახშირის იმპორტი და ტრანზიტი აკრძალა და სერიოზული მსჯელობა მიმდინარეობს ნავთობის ემბარგოზეც და ზოგადად რუსულ ენერგომატარებლებზე უარის თქმაზეც. ამასობაში, წლის დასაწყისიდან ნავთობი 30%–ით არის გაძვირებული რუსეთის მიერ უკრაინის წინააღმდეგ განხორციელებული სამხედრო აგრესიის ფონზე, რასაც თავის მხრივ უმკაცრესი სანქციები და გლობალური ლოგისტიკური ჯაჭვის რღვევა მოჰყვა.
ბარკინდო კი ამბობს, რომ ნავთობის გაძვირება უფრო პოლიტიკური ფაქტორებით არის გამოწვეული და არა ფუნდამენტური ფაქტორებით, როგორიცაა ნავთობის ბაზარზე მოთხოვნა–მიწოდება.
„ეს არაფუნდამენტური ფაქტორებია და საერთოდ არ ექვემდებარება OPEC-ის კონტროლს“, – თქვა ბარკინდომ სააგენტო Bloomberg-თან ინტერვიუში.