ნავთობის მწარმოებელ ქვეყანათა კავშირი (OPEC) და მისი მოკავშირეები, რუსეთის ჩათვლით, ოქტომბრიდან წარმოების მცირედით შემცირებაზე შეთანხმდნენ.
ქვეყნები წარმოებას დღეში 100,000 ბარელით შეამცირებენ, რაც გლობალური მოთხოვნის 0.1%-ს შეადგენს. OPEC-ის შემდეგი შეხვედრა 5 ოქტომბერსაა ჩანიშნული, თუმცა წევრებს სამომავლო წარმოების დონის განსასაზღვრად ამის გაკეთება მანამდეც შეეძლებათ.
შემცირების მიზეზი ფასებზე გავლენის შენარჩუნებაა - ნავთობის ღირებულებამ აგვისტოში მკვეთრად დაიწია, რაც მსოფლიოს წამყვანი ეკონომიკების რეცესიის რისკმა, ეკონომიკური აქტივობის შენელების და შესაბამისად, მოთხოვნის კლების მოლოდინმა განაპირობა.
ფასების კლებას OPEC-ის უმსხვილესმა მწარმოებელმა, საუდის არაბეთმა უპასუხა განცხადებით, რომ მიწოდება, შესაძლოა, შემცირებულიყო, რის შემდეგაც ნავთობი კვლავ გაძვირდა.
ამ გადაწყვეტილებამ ნავთობის ფასის ზრდა დღესაც გამოიწვია და Brent-ის ტიპის ნედლი ნავთობის ღირებულებამ 3.4 დოლარით, თითქმის 3.7%-ით მოიმატა და ამჟამად 96.4 დოლარიან ნიშნულზეა, WTI-ის ტიპის ნედლი ნავთობი კი 3.4%-ით, 89.7 დოლარამდე გაძვირდა.
ნავთობის საერთაშორისო ბაზარზე მდგომარეობა კვლავ ბუნდოვანია - დიდი შვიდეულის (G7) ქვეყნები რუსული ნავთობის იმპორტზე საფასო ჭერის დაწესებაზე შეთანხმდნენ, რუსეთი კი აპირებს, სრულად შეუწყვიტოს მიწოდება ამ პოლიტიკის მომხრეებს. უცნობია, აღგება თუ არა 2015 წლის ბირთვული შეთანხმებაც, რაც დასავლურ ბაზარს დღეში 1 მილიონ ბარელ ნავთობს შემატებს.
წყარო: ბიზნესპრესნიუსი