ოქრო ბოლო ერთ წელში ყველაზე ძვირი ღირს - რუსეთის უკრაინაში შეჭრამ აღმოსავლეთ ევროპაში კრიზისი, ხოლო ინვესტორებში რისკებთან დაკავშირებული სენტიმენტები გაამწვავა. შედეგად უნცია ოქროს ფასი, გასული წლის იანვართან შედარებით, 3.4%-ით 1 973 დოლარს აჭარბებს. ეს 2020 წლის სექტემბრის შემდეგ ყველაზე მაღალი ნიშნულია.

მას შემდეგ, რაც რუსულმა არმიამ უკრაინას შეუტია, ვლადიმერ პუტინმა ქვეყნის დემილიტარიზაციის პირობა და მისი ლიდერების ჩანაცვლება, ხოლო ჯო ბაიდენმა პასუხად დამატებითი სანქციების შესახებ განაცხადა, ინვესტორები სტაბილურ აქტივებს მიაწყდნენ.

„უკრაინაში რუსეთის შეჭრამ ბაზრებზე პანიკა გააჩინა, ინვესტორები პორტფელებიდან ფასიან ქაღალდებს იშორებენ და სტაბილურ აქტივებში გადააქვთ,“ განაცხადა Heraeus Metals Germany-ის უფროსმა ტრეიდერმა, ალექსანდერ ზუმპფემ.

ამ დრომდე არსებული პროგნოზით, აშშ ფედერალური სისტემის მხრიდან მოსალოდნელი მონეტარული პოლიტიკის გამკაცრების გამო, პროგნოზი ოქროს ფასის ზრდას არ აჩვენებდა. ახლა ანალიტიკოსებს, დიდი ალბათობით, მიმდინარე წლისთვის პროგნოზების გადახედვა მოუწევთ.

„ჩვენ ველით, რომ ოქროს ფასი 2000 დოლარიან ნიშნულამდე მივა უახლოეს დღეებში, კონფლიქტის შემდგომი ესკალაციის შემთხვევაში,” განაცხადა Natixis SA-ის ნედლეულის მიმართულების უფროსმა ანალიტკოსმა, ბერნარდ დადამ.

ფასი გაიზარდა სხვა ძვირფას მეტალებზეც, მათ შორის განსაკუთრებით პალადიუმზე (+8%), მიწოდების ჯაჭვის შეფერხებასთან დაკავშირებული შიშების გამო. გლობალური ბაზარი პალადიუმის 40%-ს სწორედ რუსეთისგან იღებს. აღმასვლა აჩვენა ვერცხლის და პლატინის ფასმაც, Bloomberg Dollar Spot Index-ი კი 0.7%-ით არის გაზრდილი.

წყარო: Bloomberg, businessformula.ge