2022 წლის ოქტომბერში, გაცვლითი კურსის ეფექტის გამორიცხვით, სესხები წლიურად 13.8%-ით გაიზარდა და 43.2 მლრდ ლარი შეადგინა. სესხების ზრდის ტემპმა წინა თვესთან შედარებით 0.7 პპ-ით მოიკლო. ამის შესახებ ინფორმაციას ეროვნული ბანკი აქვეყნებს.

„სესხების ზრდის ტემპის კლება მეტწილად ეროვნული ვალუტით დაკრედიტების შენელებამ განაპირობა. ოქტომბერში, ლარით დაკრედიტება წლიურად 18.2%-ით გაიზარდა და მთლიანი სესხების ზრდაში 8.8 პპ-იანი წვლილი შეიტანა. უცხოური ვალუტით დაკრედიტება (გაცვლითი კურსის ეფექტის გამორიცხვით) 9.7%-ით გაიზარდა და მთლიანი სესხების ზრდაში 5.0 პპ-იანი წვლილი შეიტანა. დაკრედიტების შენელება ძირითადად ბიზნესს სესხების დაკრედიტების შენელებამ განაპირობა. წინა თვესთან შედარებით, ამავდროულად შენელებულია სამომხმარებლო და იპოთეკური სესხების ზრდის ტემპები“, — აღნიშნავენ ეროვნულ ბანკში.

მიმდინარე წლის ოქტომბერში სესხების საშუალო შეწონილი საპროცენტო განაკვეთები წინა თვესთან შედარებით 0.4 პპ-ით გაიზარდა და 13.3% შეადგინა. ეროვნული ვალუტით სესხებზე საშუალო შეწონილი წლიური საპროცენტო განაკვეთი 0.3 პპ-ით 16.4%-მდე გაიზარდა, ხოლო უცხოური ვალუტით გაცემულ კრედიტებზე საპროცენტო განაკვეთი 0.3 პპ-ით შემცირდა და 7.1% დონეზეა.

„იურიდიულ პირებზე ეროვნული ვალუტით გაცემული სესხების საპროცენტო განაკვეთი 0.2 პპ-ით შემცირდა და მიმდინარე წლის ოქტომბერში და 13.6% შეადგინა. იპოთეკურ სესხებზე ეროვნული ვალუტით გაცემული სესხების საპროცენტო განაკვეთი მცირედით შემცირდა და 12.5% შეადგინა. განვითარებული ქვეყნების ცენტრალური ბანკების მიერ მონეტარული პოლიტიკის განაკვეთების ზრდასთან ერთად ადგილობრივ ბაზარზე უცხოური ვალუტით გაცემულ სესხებზე საპროცენტო განაკვეთებმა ზრდა დაიწყო. კერძოდ, უცხოური ვალუტის იპოთეკური სესხების საპროცენტო განაკვეთები 0.13 პპ-ით - 5.9%-მდე გაიზარდა. მთლიანი საკრედიტო პორტფელის დოლარიზაცია შემცირებას განაგრძობს. გაცვლითი კურსის ეფექტის გამორიცხვით, მისი დონე წინა თვესთან შედარებით 0.1 პპით შემცირდა და 44.5%-ს გაუტოლდა. შემცირებას განაგრძობს როგორც ფიზიკური პირების, ასევე იურიდიული პირების დოლარიზაციის დონე. ოქტომბერში, ვადაგადაცილებული სესხები წინა თვესთან შედარებით 47.7 მლნ ლარით გაიზარდა და 473.9 მლნ ლარს გაუტოლდა. ვადაგადაცილებული სესხების 36.7% ეროვნული ვალუტით არის დენომინირებული“, — აცხადებენ სებ-ში.