დღევანდელი საერთაშორისო ფასის და ეროვნული კურსის გათვალისწინებით, ოქტომბერში უფრო შემცირებული საწვავის ფასები უნდა გვქონდეს, ვიდრე დღეს გვაქვს. ძალიან მალე შესაძლოა 4-იანი ნიშნული საწვავის ფასის ტაბლოებზე საერთოდ არ გვქონდეს, ამ მაჩვენებლის ფარგლებში დიზელი რჩება. სექტემბერში 10-15 თეთრიანი კლება დაფიქსირდა და ველოდებით რომ ოქტომბერშიც შემცირება ასევე 10-15 თეთრის ფარგლებში იქნება, — ამის შესახებ კონკურენციის ეროვნული სააგენტოს ხელმძღვანელმა ირაკლი ლექვინაძემ, გადაცემაში „ბიზნეს ინსაიდერი“ გიორგი აბაშიშვილთან ერთად ისაუბრა.
ირაკლი ლექვინაძე განმარტავს, რომ აგვისტოში საწვავზე ფასების შემცირების მიმართულებით 40-50 თეთრიანი კლება იყო, რასაც გარე ბაზარზე არსებულმა ვითარებამ და ვალუტის კურსის გამყარებამ შეუწყო ხელი.
„საავტომობილო საწვავის ბაზრის 2012-2013 წლის მდგომარეობა კონკურენციის სააგენტოს აქვს შეფასებული და მაშინ ბაზარზე გვყავდა 5 რეალიზატორი და პრაქტიკულად იგივე ფასები ტაბლოებზე, იმპორტიორი კი მხოლოდ რვა. ეს მაშინ როდესაც ეს ბაზარი საკმაოდ მაღალკონკურენტული იყო გარკვეული წლების წინ. 2016 წელს კონკურენციის ეროვნულმა სააგენტომ გამოაქვეყნა მოკვლევის დასკვნა, როდესაც 5 მსხვილი კომპანია დაჯარიმდა, შეთანხმებულ და კონკურენციის შემზღუდველ ქმედებებზე, ამ გადაწყვეტილებამ სასამართლო კონტროლი გაიარა და საბოლოო ჯამში ამ ხუთ მსხვილ კომპანიას გადახდილი აქვს 3 მილიონი ლარი იმ დროს არსებული ძალაუფლების გამო.
ამის შემდგომ კონკურენცის სააგენტომ მონიტორინგი გააგრძელა, მაგრამ მაინც არის კითხვები. თუ შევადარებთ 2012 წლის პერიოდს კონკურენცია რა თქმა უნდა გაუმჯობესებულია, თუმცა გარკვეული ძალაუფლება ამ კომპანიების ხელში შეიძლება მაინც იყოს და ეს იწვევდეს იმ კითხვებს რომელსაც საზოგადოება სვამს.
ჩვენს მოკვლევაში მთავარი მხოლოდ ის არ არის, რომ აღმოვაჩინოთ კანონდარღვევა და მივიღოთ შესაბამისი ზომები, არამედ გვინდა ისეთი რეკომენდაციის პაკეტი მოვამზადოთ, რომელიც სისტემურად შეცვლის რაღაც საკითხებს და ხელს შეუწყობს კონკურენციის გაძლიერებას. მათ შორის მნიშვნელოვანია მცირე ქსელების ბაზარზე პოზიციონირება და მათ მიმართ სანდოობის გაზრდა. დღეს დაახლოებით 50-მდე იმპორტიორია, როდესაც მხოლოდ 8 იყო. ამიტომ მნიშვნელოვანია მეტი კონკურენცია იყოს როგორც საცალო ასევე იმპორტიორების დონეზე.
საწვავის ფასების მოკვლევა აგვისტოში დაიწყო და ვვარაუდობთ 6 თვე იქნება ის ოპტიმალური დრო როდესაც პირველად შედეგებს გავაცნობთ საზოგადოებას“, — აღნიშნა ირაკლი ლექვინაძემ.