ლარის გაუფასურების, საწვავის და სამშენებლო მასალების მკვეთრი გაძვირების გამო ინფრასტრუქტურულ პროექტებზე მომუშავე კომპანიებს  საქმიანობის გაგრძელება უჭირთ, ხოლო ახალი ვალდებულებების შესრულებისგან მაქსიმალურად იკავებენ თავს, სანამ კრიზისია და ბიზნესი ახალი მოთხოვნების შესაბამისად გადაწყობას მოახერხებენ.

Smart Solutions-ის დირექტორის ლევან გოგსაძის განცხადებით, სამშენებლო მასალები 2-3 კვირაში მკვეთრად გაძვირდა და მარტო არმატურის შემთხვევაში, 4300 ლარს მიაღწია, რაც დიდი პრობლემაა, რადგან ამ სიტუაციაში ბიზნესის მხრიდან აღებული ვალდებულების შესრულება დიდ რისკებთანაა დაკავშირებული.

,,რამდენიმე დღის წინ ერთ-ერთი სახელმწიფო ინფრასტრუქტურული ტენდერი მოვიგეთ და უარი ვთქვით ვალდებულების აღებაზე, გადაწყვეტილება არ დავაზუსტეთ. სანამ ხელშეკრულებას ოფიციალურად გავაფორმებდით, მოხდა ფასების ზრდა და ამიტომ ვერ გავრისკეთ, საბოლოოდ კი დისკვალიფიკაცია მივიღეთ. ვფიქრობ, სხვა არჩევანი არ გვქონდა, რადგან მშენებლობაში დიდი პრობლემაა – მკვეთრად გაზრდილია ფასები საწვავსა და სამშენებლო მასალებზე. 2-3 კვირაში სამშენებლო მასალების ღირებულება ფაქტობრივად გაორმაგდა. ამ მხრივ გლობალურ პრობლემასთან ერთად, სერიოზული გავლენა მოახდინა კურსთაშორისმა სხვაობამ, ხელშეკრულებები პარტნიორ კომპანიებთან ლარშია გაფორმებული და ხარჯი კატასტროფულად გვეზრდება“, - ამბობს ლევან გოგსაძე ,,კომერსანტთან“.

მისი თქმით, საგარეო ვაჭრობაში გადაწყობა-პორტირების პროცესი მიმდინარეობს და სანამ ეს სიტუაცია არ დალაგდება, სტაბილურობა ვერ მიიღწევა.

,,სამშენებლო მასალებს უკვე ვერ მივიღებთ უკრაინიდან, ვერც რუსეთიდან, განსაკუთრებით ეს ეხება არმატურას, რომელიც ძირითადად ამ ბაზრებიდან შემოდიოდა. შექმნილ სიტუაციაში  მოხდება გადაწყობა, ვინაიდან დეფიციტია ბაზარზე და ბიზნესი მოძებნის გამოსავალს. საწვავის ფასიც მეტნაკლებად დარეგულირდება. ლარის დასტაბილურების პროცესშიც ეროვნული ბანკი ჩაერთო და მცირედით გამყარდა, ალბათ ეს ტენდენცია გაგრძელდება.  არსებული მოცემულობა უნდა შეიცვალოს, ზარალი ძალიან დიდია.  ამ ეტაპზე 2 პროექტი გვაქვს და ორივეზე ვმუშაობთ, არ ვაჩერებთ მხოლოდ იმიტომ, რომ მომწოდებელთან ვაწარმოებთ მოლაპარაკებას და თანახმა არიან, ხარჯის ზრდა დაკომპენსირდეს“, - აცხადებს ლევან გოგსაძე.

ცნობისთვის, ,,სმარტ სოლუშენსი“  ერთ-ერთი მსხვილი ინფრასტრუქტურული კომპანიაა.  2015 წლიდან იგი  ისეთ ინფრასტრუქტურულ პროექტებს ახორციელებს, როგორებიცაა:  მიწის საექსკავაციო სამუშაოები, წყალმომარაგებისა და წყალარინების ქსელის მოწყობა, გარე განათების ქსელი მოწყობა და ინსტალაცია, მიწისქვეშა კომუნიკაციების ქსელის მოწყობა, საგზაო სამშენებლო, სამონტაჟო და სარემონტო სამუშაოები.

მარი ჩიტაია