Frontera Resources Corporation-ი აცხადებს, რომ ყოფილი დირექტორი, ზაზა მამულაიშვილი, რომელიც წლების განმავლობაში წარმოადგენდა ფრონტერას საქართველოში და მასთან დაკავშირებული პირები ავრცელებენ ცრუ განცხადებებს კომპანიის სახელით. „ფრონტერა რესურს ჯორჯია კორპორეიშენის“ განცხადებაში აღნიშნულია ისიც, რომ ზაზა მამულაიშვილი, 2020 წლის აგვისტოდან თანამდებობიდან გათავისუფლებულია და უფლება არ აქვს, კომპანიის სახელით ისაუბროს. 

ზაზა მამულაიშვილმა სოციალურ ქსელში გაავრცელა ინფორმაცია, რომ ფრონტერას დედოფლისწყაროს ნავთობის საბადოზე, ნავთობისა და გაზის სახელმწიფო სააგენტო შევიდა. მისი ინფორმაციით, ისინი ცდილობდნენ კერძო საკუთრების წართმევას. ზაზა მამულაიშვილი აცხადებს, რომ ნავთობისა და გაზის სახელმწიფო სააგენტო მათი  კომპანიისთვის ლიცენზიის გაუქმებას ცდილობდა, კანონის გვერდის ავლით.

თავის მხრივ, ნავთობისა და გაზის სახელმწიფო სააგენტოს უფროსი, გიორგი ტატიშვილი აცხადებს, რომ კომპანიას ხელშეკრულებით ნავთობის ფლობის უფლება არ ჰქონდა.

კომპანია ფრონტერას იურისტები იმასაც ამბობენ, რომ ზაზა მამულაიშვილის წინააღმდეგ სისხლის სამართლებრივი დევნაა დაწყებული - საქმე ეხება მის მიერ ფრონტერას ინტერესების შესაძლო დაზიანებას და უფლებამოსილების გადაჭარბებას.

ცნობისთვის, ამერიკულ ნავთობმომპოვებელ კომპანია „ფრონტერა“ საქართველოში 1997 წლის შემდეგ დედოფლისწყაროსა და მარნეულის მუნიციპალიტეტებში მუშაობს. მიმდინარე წლის 29 აპრილს ნავთობისა და გაზის კორპორაციამ გაავრცელა საჯარო განცხადება ფრონტერასთან დადებული ხელშეკრულების შეწყვეტის თაობაზე, რომლის თანახმადაც მთელ საკონტრაქტო ფართობთან მიმართებაში, კონტრაქტი მიმდინარე წლის 27 ივლისს ავტომატურად შეწყდება.

კორპორაციამ და სააგენტომ „ფრონტერას“ წინააღმდეგ შეუსრულებელი ვალდებულებების გამო საარბიტრაჟო განხილვა 2018 წლის 15 ნოემბერს დაიწყეს. სასამართლომ დაადგინა, რომ „ფრონტერამ“ კონტრაქტი არსებითად დაარღვია და კომპანიას მოსარჩელეებისთვის ხარჯებისა და ზარალის ანაზღაურება დააკისრა, რაც ჯამში $6 მილიონს შეადგენს.

მიმდინარე წლის 30 აპრილს გავრცელდა ინფორმაცია, რომ მთავრობამ ფრონტერას ხელშეკრულება შეუწყვიტა. 4 მაისს კი „ფრონტერამ” ნავთობისა და გაზის კორპორაციის მიერ „ფრონტერასთან” დადებული ხელშეკრულების შეწყვეტაზე გავრცელებულ განცხადებას უპასუხა. კომპანიამ განაცხადა, რომ არბიტრაჟის გადაწყვეტილება არ გულისხმობს „ფრონტერას“ კონტრაქტის შეწყვეტას და ინფორმაციას საქართველოს მთავრობა კომპანიისთვის ზიანის მიყენებისა და დისკრედიტაციის მიზნით ავრცელებს.

ნავთობისა და გაზის კორპორაციის განმარტებით, ნავთობკომპანია საარბიტრაჟო განხილვის შედეგებს განზრახ ამახინჯებს და საარბიტრაჟო გადაწყვეტილების გასაჯაროვებაზე უარს ამბობს.

თავად ამერიკული ნავთობკომპანია ფრონტერა ოცნების ხელისუფლებას შევიწროებაში სდებს ბრალს და აცხადებს, რომ ქვეყანაში 2013 წლიდან მზარდია ანტიამერიკული განწყობები.

ფრონტერას საქმეზე განმარტება გააკეთა ექსპრემიერმა გახარიამაც, ხოლო ეკონომიკის მინისტრმა ნათია თურნავამ კომპანიას საერთაშორისო არბიტრაჟის გადაწყვეტილების გასაჯაროებისკენ მოუწოდა.

კომპანიამ საქმეში გარკვევა ამჟამინდელ პრემიერს, ირაკლი ღარიბაშვილსაც სთხოვა

ავტორი: ბელა გელაშვილი

წყარო: ბიზნეს ფორმულა