„ორბი ჯგუფის“ შვილობილმა „ორბი ჯგუფი ბახმარომ“ აუქციონზე ჩოხატაურის მუნიციპალიტეტში, კურორტ ბახმაროში მდებარე 545.00 კვ.მ. არასასოფლო-სამეურნეო დანიშნულების მიწის ნაკვეთი შეიძინა. აღნიშნულ მიწის ნაკვეთში კომპანიამ 217000 ლარი უკვე გადაიხადა. შესაბამისად გამოდის, რომ „ორბი ჯგუფი ბახმარომ“ კურორტ ბახმაროში 1 კვ/მ მიწის ნაკვეთი 398 ლარად იყიდა.
როგორც „კომერსანტისთვის“ გახდა ცნობილი, აღნიშნული მიწის ნაკვეთი იმ ტერიტორიის ახლობლად მდებარეობს, რომელიც კომპანიამ წლების უკან საინვესტიციო ვალდებულებებით 1 ლარად მიიღო. აღნიშნული მიწის ნაკვეთი „ორბიმ“ საინვესტიციო ვალდებულების გარეშე იყიდა.
როგორც „კომერსანტი“ წერდა „ორბი ჯგუფი“ კურორტ ბახმაროში ტურისტული ინფრასტრუქტურის შექმნაზე მუშაობს, სადაც სტუმრების მიღებას 2024 წლის ზაფხულისთვის ვარაუდობს. კომპანიამ ბახმაროში სახელმწიფო საკუთრებაში არსებული 43 269 კვ/მ არასასოფლო-სამეურნეო დანიშნულების მიწის ნაკვეთი და მათზე განთავსებული შენობა-ნაგებობები 2019 წლის მაისში სიმბოლურ ფასად, 1 ლარად იყიდა. ქონება „ორბი ჯგუფმა“ გარკვეული ვალდებულებების სანაცვლოდ შეიძინა და ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნულ სააგენტოსთან 2019 წლის 17 ივლისს ნასყიდობის ხელშეკრულება გააფორმა.
ინვესტორი ვალდებულია გადაცემულ მიწის ნაკვეთზე პირადად ან მესამე პირის მეშვეობით ხელშეკრულების გაფორმებიდან მაქსიმუმ 60 თვეში უზრუნველყოს მრავალფუნქციური კომპლექსის მშენებლობა, რომელიც მოიცავს (მაგრამ შესაძლოა, არ შემოიფარგლებოდეს) მინიმუმ 120 ნომრის მქონე სასტუმრო(ებ)ს, კომერციული დანიშნულების ფართ(ებ)ს, კვების ობიექტ(ებ)ს; სპორტულ მოედანს/მოედნებს, ქონების ან მისი ნაწილის შემოღობვას, გამწვანებას, გარე განათებას.
უფრო დეტალურად ინფორმაცია იხილეთ აქ: