მომხმარებელთა უფლებების დამცველი არასამთავრობო ორგანიზაცია ,,ეტიკი“ სასწორების სიზუსტესთან დაკავშირებით კვლევას იწყებს. სასწორების მონიტორინგი საქართველოს მასშტაბით ჩატარდება და მოიცავს როგორც ბაზრობებს, ასევე სუპერმარკეტებსაც.

როგორც  „ეტიკის“ დამფუძნებელი ამირან შენგელია ,,კომერსანტთან“ ამბობს, კლიენტის გადახდილ ფულთან წონის შეუსაბამობის პრობლემა განსაკუთრებით ტურისტულ რეგიონებში შეინიშნება, ამიტომ გადაწყდა, რომ განსაკუთრებით მკაცრად შეამოწმონ ტურისტული ზონები, სადაც, მისივე თქმით, მომხმარებლების მოტყუების ფაქტები მასობრივია.

,,მომხმარებელთა უფლებების შესახებ კანონი მთავრობამ მიიღო და როგორც კი კანონპროექტი ძალაში შევა, ჩვენ კონტროლის მეტი შესაძლებლობა გვექნება და გამოვლენილი ფაქტების მიმართაც სათანადო რეაგირებას ველოდებით, რაც აქამდე პრობლემა იყო. სასწორებს სიზუსტეზე ქვეყნის მასშტაბით შევამოწმებთ, ფაქტობრივად ყველა რეგიონს მოვიცავთ, რადგან პრობლემა ყველგან არის. აჭარა განსაკუთრებით, ტურისტული ზონაა და კარგად იცით, რაც ხდება. ასევე სხვა ტურისტულ რეგიონებშიც, შეძენილი პროდუქტის წონაში მომხმარებლების მოტყუების ფაქტები ყველგან ხშირია. არავისთვის არ არის უცხო, რომ თვითნებურად დაკალიბრებული ელექტროსასწორები 1 კგ-ში, საშუალოდ, 50-100 გრამს იპარავს. აგრარული ბაზრების შემთხვევაში, ეს მაჩვენებელი 200 გრამსაც აღწევს“, - აცხადებს ,,კომერსანტთან“ ამირან შენგელია.

მისივე ინფორმაციით, წონის პრობლემა განსაკუთრებით ეხება მარცვლეულს, შაქარს, ხილ-ბოსტნეულს, რომელზეც ყველაზე დიდი მოთხოვნაა.

,,წონის გაკონტროლების შემთხვევაში, მომხმარებელს აქვს უფლება, გამყიდველს დანაკარგის ანაზღაურება მოსთხოვოს. როდესაც მომხმარებელს წონის გადამოწმების შესაძლებლობა არ აქვს, განიცდის ეკონომიკურ ზარალს და ამით მისი უფლებები ირღვევა“, - განმარტავს ამირან შენგელია.

სავაჭრო ობიექტებში სასწორების შემოწმება ივლისში დაიწყება.

,,ეტიკის“ დამფუძნებელი ამბობს, რომ დღეში საშუალოდ 25-30 ობიექტის შემოწმებას შეძლებენ.

ცნობისთვის, მომხმარებლების უფლებებს დაცვა კონკურენციის სააგენტოს ევალება. კანონპროექტის თანახმად, სააგენტო მიიღებს საჩივრებს მომხმარებლებისგან და ათი სამუშაო დღის ვადაში მიიღებს გადაწყვეტილებას თითოეულ საჩივარზე. დარღვევის გამოვლენის შემთხვევაში პასუხისმგებლობა მოვაჭრეს დაეკისრება. თავდაპირველად მას ხარვეზის გამოსასწორებლად მიეცემა დრო და თუ მოვაჭრე არ გამოასწორებს ხარვეზს, მას სავაჭრო ბრუნვის არაუმეტეს 2%-ით დააჯარიმებენ. თუ შემთხვევა ერთი წლის განმავლობაში გამეორდება, ჯარიმა გაორმაგდება.

მარი ჩიტაია