შიში ახალი პანდემიის წინაშე და სწრაფი ვაქცინაცია ევროპაში და ამერიკაში იწვევს მწვავე დებატებს არავაქცინირებული მოქალაქეების უფლებების შეზღუდვის თაობაზე.

სხვა შემთხვევებში თავშეკავებული და კორექტული ჯო ბაიდენი ამ შემთხვევაში ძალიან კატეგორიულია და „აუცრელებს შორის პანდემიაზე“  საუბრობს.

საბოლოო ჯამში,  დისკუსიის არსი მარტივია - რისი უფლებები ექნებათ ვაქცინირებულებს, და რისი უფლებები არ ექნებათ არავაქცინირებულებს?

საკანონმდებლო ინიციატივების და პოლიტიკური მიზნებისგან განურჩევლად, დასავლეთში ორკლასიანი საზოგადოება - აცრილები და აუცრელები,  უკვე რეალობად იქცა. ყველა ქვეყანაში, სადაც მოსახლეობის 50%-ზე მეტი ვაქცინირებულია, მათ მრავალი შეღავათები უწესდებათ, ძირითადად  სწორედ მდიდარ და დემოკრატიულ ქვეყნებში.

ამავე დროს აზიის ქვეყნების უმეტესობაში ვაქცინაციამ ჯერ ამ მასშტაბებს ვერ მიაღწია. შესაბამისად, იქ საზოგადოების 2 ნაწილად გაყოფა ჯერ შესამჩნევი არ არის.

ამ პარასკევს იტალიაში შემოვიდა სავალდებულო „მწვანე პასპორტი“, რომელიც მისი მფლობელის მიერ ვაქცინაციის გავლას დაადასტურებს. ეს საბუთი აუცილებელი იქნება თეატრებში, მუზეუმებსა და აუზებში შესასვლელად, ასევე რესტორნების შიდა ნაწილებში ყოფნისა და მასობრივ ღონისძიებებზე დასწრებისთვის.

სავარაუდოდ,  სექტემბრიდან ეს სია გაფართოვდება.  „მწვანე პასპორტის“  გარეშე ადამიანებისთვის დახურული იქნება მატარებლები, საზღვაო ხომალდები და თვითმფრინავები.

იტალიელები ამ ინიციატივას მხარს უჭერენ, თუმცა,  ბოლო დღეებში ათასობით ადამიანმა ორკლასიანი საზოგადოების ფაქტობრივი ჩამოყალიბება გააპროტესტა.

იტალიელების გარდა, ვაქცინაციის გავლის დადასტურება ფრანგებსაც მოუწევთ.  როგორც მინიმუმ, მათ დაევალებათ  პსრ-ტესტის უარყოფითი პასუხის წარდგენა.

„ჯანმრთელობის პასპორტი“ მოქალაქეებს ბევრ კარს გაუხსნის. 21 ივლისიდან მისი წარდგენა აუცილებელია სპორტულ ღონისძიებებზე და კონცერტებზე დასწრებისთვის, თეატრებში და კინოთეატრებში შესასვლელად.

9 აგვისტოდან კი ამ ჩამონათვალს დაემატება ბარ-რესტორნები, მატარებლები და თვითმფრინავები.

ბრიტანეთში რამდენიმე დღის წინ კოვიდ-საშვების სისტემა ამოქმედდა. მისი მიღებისთვის 4 გზა არსებობს - ვაქცინაცია, გადატანილი ინფექცია, პრს-ტესტი და ცნობა იმის შესახებ, რომ ვაქცინაცია სამედიცინო ჩვენებების გამო შეუძლებელია.

მთავრობა განიხილავს კოვიდ-საშვების ვალდებულებას რესტორნებსა და ბარებში შესვლისთვის, თუმცა, საბოლოო გადაწყვეტილება ჯერ მიღებული არაა. თუმცა არის ცალმხრივი გადაწყვეტილებების მიღების ფაქტებიც. მაგალითად,  საფეხბურთო გუნდი „ჩელსი“ სტადიონზე მხოლოდ ვაქცინირებულებს ან უარყოფითი პრს-ტესტის მქონე მოქალაქეებს შეუშვებს.

არის უკვე შემთხვევებიც, როდესაც ბიზნესი თანამშრომლებ აცრას ავალდებულებს. ლონდონური სანტექნიკური კომპანია Pimlico Plumbers-მა 400 თანამშრომელს აცრისთვის დრო წლის ბოლომდე მისცა, წინაამღდეგ შემთხვევაში მათ სამსახურიდან დათხოვნით დაემუქრა.

ორკლასიანი საზოგადოება სწრაფი ტემპებით შენდება ოკეანის მიღმაც. ნიუ-იორკში რესტორნებს და ბარებს სტუმრების აცრების სერტიფიკატების შემოწმება დაევალათ, რაც აშშ-ში პირველი მსგავსი პრეცედენტია.

„თუ გსურთ საზოგადოებრივ ცხოვრებაში აქტიური მონაწილეობა, მაშინ აცრა უნდა გაიაროთ“ - განაცხადა ნიუ-იორკის მერმა ბილ დე ბლაზიომ.

ეს მხოლოდ დასაწყისია.  ამა თუ იმ ფორმით არავაქცინირებული მოსახლეობის უფლებების უხეში შეზღუდვა ევროპის თითქმის ყველა ქვეყანაში, შტატებსა და კანადაში უკვე დაიწყო და ამ ეტაპზეც აქტიურად მიმდინარეობს.