რამდენად აისახა ორნიშნა ეკონომიკური ზრდა მოსახლეობის კეთილდღეობაზე, რა გამოწვევების წინაშე იდგა ეკონომიკა 2021 წელს და როგორ ხვდება მოსახლეობა ახალ 2022 წელს, რა სირთულეები გველის? - ამ და სხვა თემებზე სასაუბროდ ირაკლი მაკალათიამ რადიო ,,კომერსანტში“ თავის საავტორო გადაცემაში ,,პროფესიონალები“ სოსო ბერიკაშვილი, კავკასიის ეკონომიკური სკოლის დეკანი მიიწვია.
როგორც აღმოჩნდა, სოსო ბერიკაშვილი ქვეყნის ერთ-ერთ დიდ სოციალურ და ეკონომიკურ პრობლემად მოსახლეობის დაბალი მსყიდველუნარიანობა, შემცირებული შემოსავლები და გაუარესებული ბიზნეს გარემო მიიჩნია, რის ფონზეც ეკონომიკურ ზრდას მოსახლეობა ვერ გრძნობს და ინვესტიციების მიმართულებითაც ვითარება კვლავ საგანგაშოა.
,,მოსახლეობის შემოსავლები ვერ იზრდება. ზოგიერთ შემთხვევაში, ადამიანები სამსახურს კარგავენ. ამ ფონზე გაზრდილი ფასები არის ძალიან მძიმე და რთულად ასატანი. თუმცა პოზიტიურია ეკონომიკური ზრდა, შარშანდელთან შედარებით ექსპორტიც მყარ პოზიციაზეა. ერთადერთი, რაც ეკონომიკას აცოცხლებს, ფულადი გზავნილებია, რომელიც 2020 წელსაც არ შემცირებულა. შეიძლება ითქვას, რომ ჩვენ გვარჩენენ ემიგრანტები. დიდი მადლობა მათ, ძალიან ბევრს შრომობენ, რომ სამშობლოში დარჩენილ ოჯახებს დაეხმარონ, მაგრამ ეს არ არის ქვეყნის ნორმალური განვითარების მაჩვენებელი. მით უმეტეს იმ ფონზე, როცა კატასტროფულად შემცირდა ინვესტიციები. 2019 წელთან შედარებით 26%-იანი კლება ფიქსირდება, აბსოლუტურ ციფრებში გაცილებით მაღალი მაჩვენებლით არის შემცირებული. რა ინვესტიციაც ხორციელდება, მუდმივად ერთსა და იმავე სექტორებშია. ამასთან, დიდი ნაწილი რეინვესტირებაა ანუ ახალი არაფერი შემოდის, რაც პრობლემაა და პასუხისმგებლობა ხელისუფლებას მთელ გუნდს ეკისრება. პოლიტიკური ნების საკითხია. ელემენტარულად, თავისუფალი და მიუკერძოებელი სასამართლო გქონდეს. ხელისუფლებას არ ევალება ეკონომიკის კეთება პირდაპირ, არამედ შექმნას გარემო, სადაც ადამიანებს ბიზნესის კეთების სურვილი და შესაძლებლობა ექნებათ“, - განაცხადა ბერიკაშვილმა რადიო ,,კომერსანტთან“.
ნეგატიურ ფაქტორებს შორის მან დაასახელა ინფლაციაც და აღნიშნა, რომ მომავალი წლიდან, განსაკუთრებით გვიან ზაფხულში მცირე კლებას ექნება ადგილი, მაგრამ ფასების ზრდის ტენდენციას ვერ შეაჩერებს.
,,საერთაშორისო ბაზრებზე ფასების დიდი ზრდაა. მაქსიმუმ, 2 %-ით შეიძლება შევამციროთ ინფლაცია, მეტი რესურსი არ მოგვეპოვება. ვვარაუდობ, რომ ინფლაცია შემცირდება გაზაფხულიდან თუ არა გვიანი ზაფხულიდან, მაგრამ გარე ფაქტორებზეც ვართ დამოკიდებული. მაგალითად, საწვავის ფასები როგორ დაკორექტირდება, წინასწარ არავინ იცის. ინფლაცია შემცირდება, მაგრამ ფასების ზრდა გაგრძელდება უფრო დაბალი ტემპით, ვიდრე ახლა მიმდინარეობს. ახალ წელს გაზრდილი ფასები მძიმედ გვაწვება. ბევრი ადამიანი ხარჯის გაწევას საახალწლოდაც ვერ ახერხებს. მართალია, ციფრებში საახალწლო სუფრა მაინც და მაინც ძვირი არ ჩანს, მაგრამ ჩვენი მოქალაქეების დიდ ნაწილს არ აქვს 183 ლარი წინასაახალწლოდ, სესხის აღება უწევთ და მთელი წელი ვალი უნდა იხადოს. ჩვენი დიდი პრობლემაა, რომ ეკონომიკური ზრდა ვერ აისახება მოსახლეობის კეთილდღეობაზე. ორნიშნა ზრდა ჩემთვის არაფერს ნიშნავს, თუ ამის ეფექტს საკუთარ ჯიბეზე ვერ ვიგრძნობთ. 2 დიდი პროექტი ეკონომიკას გაზრდის, მაგრამ მოსახლეობაზე თუ არ აისახება, შედეგს ვერ მოიტანს. მთავარია, შემოსავლებიც იზრდებოდეს, რა მხრივაც საქართველოს მოსახლეობა მძიმე მდგომარეობაშია“, - აღნიშნა სოსო ბერიკაშვილმა.
კავკასიის ეკონომიკური სკოლის დეკანმა ყურადღება პანდემიურ მდგომარეობაზეც გაამახვილა.
მისი შეფასებით, ვაქცინაცია ფაქტობრივად ჩავარდნილია, მძიმე პანდემიური ვითარებაა და ათასობით ადამიანი იღუპება, რაც ეკონომიკას ძალიან აზარალებს.
მარი ჩიტაია