თურქეთში მომხდარი მიწისძვრის მსხვერპლთა რიცხვი უკვე 7000-ს აჭარბებს. დიდია ეკონომიკური ზარალიც და როგორც ანალიტიკოსები ვარაუდობენ ის რამდენიმე მილიარდს მიაღწევს.
სწორედ თურქეთია საქართველოს ყველაზე დიდი სავაჭრო პარტნიორი, რა გავლენა ექნება მეზობელ ქვეყანაში განვითარებულ პროცესებს თურქეთ-საქართველოს სავაჭრო ურთიერთობებზე, ამის შესახებ „კომერსანტთან“ თურქეთის „საგარეო ეკონომიკური ურთიერთობის საბჭოში“ (DEIK) შემავალი თურქეთ-საქართველოს ბიზნეს საბჭოს თავმჯდომარემ ოსმან ჩალიშქან მჟავანაძემ ისაუბრა.
როგორც ოსმან ჩალიშქან მჟავანაძე აცხადებს, ამ დროისათვის ბიზნესის და მთავრობის ყურადღება ადამიანების გადარჩენისკენაა მიმართული და მის ეკონომიკურ ეფექტზე ბიზნესმენი წინასწარ ვერ საუბრობს.
„მიწისძვრის გამო თურქეთში საკმაოდ მძიმე ვითარებაა, ჯერჯერობით არ ვიცით ეკონომიკაზე რა გავლენა ექნება ამ პროცესებს. ბიზნესი, მთავრობა, მთელი ქვეყანა, მეზობელი ქვეყნები ელოდებიან იმას, რომ რაც შეიძლება ბევრი ცოცხალი ადამიანი გამოვიყვანოთ ნანგრევებიდან და თან დავეხმაროთ მოქალაქეებს. ეკონომიკა და მისი მდგომარეობა გამოჩნდება შემდეგ. ცუდია, რომ სტამბულის ბირჟა დაიხურა.
თურქეთში მიმდინარე პროცესების ფონზე საქართველოსთან ეკონომიკური ურთიერთობების მხრივ პრობლემა არ შეიქმნება. როგორც პანდემიის დროს იყო, ჯერ ქვეყანა ახდენდა საჭიროებების დაკმაყოფილებას და მერე გზავნიდა ექსპორტზე და ანალოგიური მომენტია ამ წუთში. თუმცა საქართველო თურქეთისთვის მნიშვნელოვანი მეზობელი და პარტნიორია და გავლენას სავაჭრო ურთიერთობებზე არ მოახდენს,“ - განუცხადა „კომერსანტს“ ოსმან ჩალიშქან მჟავანაძემ.
თურქეთი (2 806.4 მლნ. აშშ დოლარი) საქართველოს უმსხვილესი სავაჭრო პარტნიორია. მთლიან ექსპორტში თურქეთის წილი 7.8%-ია, ხოლო იმპორტში 17.6%-ი.