მსოფლიოს განვითარებული ქვეყნების მხოლოდ ნახევარი ფარავს იმ ხარჯებს, რომელიც კლიმატის ექსტრემალური ცვლილების წინააღმდეგ ბრძოლისთვისაა საჭირო. ამის შესახებ საუბარია საერთაშორისო საქველმოქმედო და ჰუმანიტარული ორგანიზაცია Oxfam-ის განცხადებაში, რომელიც ბონის ყოველწლიური კლიმატის ცვლილების შესახებ გაეროს კონფერენციაზე გავრცელდა.
„მდიდარი ქვეყნები არა მხოლოდ უუნარონი არიან საკმარისი ჰუმანიტარული დახმარება გაიღონ სტიქიური უბედურებების დროს დაზარალებულების დასახმარებლად, ისინი ასევე არ ასრულებენ დაპირებას, გამოყონ წლიურად 100 მლრდ დოლარი, რათა დაეხმარონ განვითარებად ქვეყნებს, რომ მათ კლიმატის ცვლილებზე ადაპტირება მოახდინონ“, - განაცხადა Oxfam-ის დირექტორმა დენი შრისკანდარაჯამ კონფერენციაზე სიტყვით გამოსვლისას.
ეკოლოგების მონაცემებით, 2021 წელს სტიქიური უბედურებების შედეგად გამოწვეულმა ეკონომიკურმა დანაკარგებმა 329 მლრდ დოლარი შეადგინა და თითქმის ორჯერ გადააჭარბა გამოყოფილ დახმარებას.
ამასთან, როგორც Oxfam-ში ამბობენ, ბუნებრივი კატაკლიზმების შედეგად მიყენებული ზარალის ყველაზე მაღალი დონე ფიქსირდება ისეთ ქვეყნებში როგორებიცაა სომალი, ეთიოპია, კენია და სამხრეთ სუდანი, რომლებიც თავის მხრივ, მსოფლიო ემისიების მხოლოდ 0,1%-ს გამოყოფენ, მაშინ როცა მდიდარ ქვეყნებზე გლობალური ემისიების 37% მოდის.
„ისეთმა მდიდარმა ქვეყნებმა როგორებიც არიან დიდი ბრიტანეთი, საკუთარ თავზე უნდა აიღოს სრული პასუხიმგებლობა იმ ზიანზე, რომელსაც მათი ემისიები აყენებენ მსოფლიოს და უნდა გამოყონ ფინანსური კომპენსაცია ღარიბი ქვეყნებისთვის“, - განაცხადა შრისკანდარაჯამ.
გაეროს კლიმატის ცვლილების საკითხების შესახებ კონფერენცია ბონში 6-16 ივნისის პერიოდში ტარდება. მისი მთავარი მიზანია დაეხმარონ ღარიბ ქვეყნებს სტიქიური უბედურებებისგან მიყენებული ზიანის აღმოფხვრაში.