გერმანიაში წარმოებულ ცხოველის ხორცის ყველა პროდუქტზე მალე ცხოველთა შენახვის პირობები იქნება მითითებული. ამის შესახებ სოფლის მეურნეობის მინისტრ ჯემ ოზდემირმა სამინისტროს გეგმის წარდგენის დროს განაცხადა, რასაც გამოცემა Euractiv ავრცელებს.
„გერმანიაში მეცხოველეობა მომავალში მხოლოდ იმ შემთხვევაში ჩაითვლება შესაფერისად, თუკი ის ცხოველთა კეთილდღეობისთვის სამართლიანი იქნება,“ - აცხადებს ოზდემირი.
მინისტრმა ცხოველური წარმოშობის პროდუქციაზე საერთოეროვნული მარკირების სისტემის დანერგვის შესახებ საკონტროლო დოკუმენტი წარადგინა. გაცხადებული გეგმის მიხედვით, მწარმოებლებს ახალი ზომების დანერგვა მომდევნო რამდენიმე წლის განმავლობაში ეტაპობრივად მოუწევთ.
მმართველმა სამმა პარტიამ ცხოველთა კეთილდღეობის სავალდებულო ნიშნის შემოღება ჯერ კიდევ კოალიციურ შეთანხმებაში ასახა. მინისტრის თქმით, მარკირება ფერმერებს დაეხმარება, რომ ცხოველთა კეთილდღეობაში მათი ინვესტიცია უფრო თვალსაჩინო გახადონ, ხოლო მომხმარებლებისთვის მეტ გამჭვირვალობას შექმნის.
„მყიდველებს სურთ, იცოდნენ, როგორ ცხოვრობდა ცხოველი, რომლის ხორცსაც ისინი ყიდულობენ, რაც მათ შემდგომი შეძენის გადაწყვეტილებაშიც დაეხმარება,“ - ამბობს ოზდემირი.
გასულ წელს, წინა მინისტრმა, იულია კლოკნერმა, ასევე, წარადგინა გეგმა სახელმწიფო, ოღონდ, ნებაყოფლობითი მარკირების შემოღების შესახებ, რომელიც სოციალ-დემოკრატების წინააღმდეგობის გამო ჩავარდა, რადგან ისინი მთლიანად სავალდებულო მარკირების შემოღებას ემხრობოდნენ.
ცხოველურ პროდუქტებთან დაკავშირებით ჯემ ოზდემირის გეგმა ცხოველთა კეთილდღეობის გამოკვეთილ მითითებებს მოიცავს. სავალდებულო მარკირება გავრცელდება ყველაფერზე, რაც ცხოველური წარმოშობის პროდუქტს შეიცავს, მათ შორის გადამუშავებულ პროდუქტებზე, როგორიც არის გაყინული პიცა ან მზა ქათმის სალათები.
ამასთან, სუპერმარკეტებში გამოტანილი და ონლაინ მაღაზიებში გამოფენილი შეფუთული პროდუქცია მარკირებული უნდა იყოს.
ხორცპროდუქტები
