ოზურგეთში 1 ჰექტარ ტერიტორიაზე მოწყობილი ლოკოკინების ფერმა „ლოკოფერმი“ იყიდება.

კომპანიის ინფორმაციით, ფასი დამოკიდებულია შეთანხმების დეტალებზე, რადგან „ლოკოფერმი“ სარგებლობს იაფი აგროკრედიტით, შესაბამისად მთლიანი კომპანიის გამოსყიდვის შემთხვევაში შესაძლოა ღირებულება 700 000 ლარიც იყოს, წილების ნაწილის შესყიდვის შემთხვევაში კი განსხვავებული.

„1 ცალი ლოკოკინას წონა 15-დან 21 გრამამდეა. სარეალიზაციო ფასი 3.5 - 4 ევრო. ამ ეტაპზე გაშენებულია მხოლოდ იტალიური ჯიშის ლოკოკინა MAXIMA, თუმცა შესაძლებელია სხვა ჯიშების გაშენებაც, მაგალითად Muller და სხვა. 

ჰექტარზე განთავსებულია 40 არეალი, თითო 40 მეტრის სიგრძისა და 3.5 მეტრის სიგანით, შესაძლებელია ამავე ტერიტორიაზე დამატებით 6-7 არეალის მოწყობა“, -აღნიშნავენ კომპანიაში.

მთლიანად კომპანიის კუთვნილი მიწის ნაკვეთის საერთო ფართია 3 ჰა, აქედან 1 ჰა-ზე გაშენებულია არსებული ფერმა. სამომავლოდ, მთლიანი ტერიტორიის ათვისების შემთხვევაში, 3 ჰექტარზე გაშენდება 120-130 არეალი. აქვე, შესაძლებელია თევზსაშენი მეურნეობის მოწყობაც. ტერიტორიაზე განთავსებულია 120 მ2 საერთო ფართის შენობაც - სასაწყობე, საოფისე ფართებით. კომპანიის საკუთრებაშია ასევე სასოფლო-სამეურნეო ტექნიკა: Lovol-ის მარკის ტრაქტორი, ასევე, Mitsubisi-ის მარკის მინი სატვირთო ავტომობილი. 

ლოკოფერმის“ მოწყობა 2021 წლის დასაწყისში ნახევარი მლნ ლარის ინვესტიციით განხორციელდა, ლოკოკინების მოშენება კი შემოდგომაზე დაიწყო და პირველი მოსავალი მიმდინარე წლის ზაფხულში მიიღეს, რომელმაც 4 ტონა შეადგინა.