რუსეთიდან საქართველოში აპრილში $133 მლნ გადმოირიცხა, რაც წინა ოთხი თვის ჯამურ მაჩვენებელზე მეტია, გასული წლის ანალოგიური პერიოდთან შედარებით კი 299%-იანი ზრდა ფიქსირდება. სანქცირებული და ეკონომიკური პრობლემების მქონე ქვეყნიდან ამ მასშტაბის ზრდამ გარკვეული კითხვები გააჩინა. მეტი ინფორმაციის მისაღებად კომერსანტი ახალი ეკონომიკური სკოლის პრეზიდენტ პაატა შეშელიძეს დაუკავშირდა.
პაატა შეშელიძის შეფასებით, გადმორიცხვების რეკორდული ზრდა მაინც და მაინც შავი ფულის შემოდინებას არ გულისხმობს და შესაძლოა რუსეთის მოქალაქეები ფულის შესანახად უფრო სანდო ადგილს ეძებენ. მისივე თქმით, ეროვნულ ბანკს ფულის გათეთრების მასობრივი მცდელობის გამოსავლენად და აღსაკვეთად საკმარისი რესურსი გააჩნია და გამკაცრებული რეგულაციების პირობებში, როდესაც ასდოლარიანის დახურდავების შემთხვევაშიც უცხო ქვეყნის მოქალაქეებისთვის პასპორტი მოითხოვება, მაქინაციების ჩატარება რთული იქნება.
როგორც შეშელიძემ კომერსანტთან საუბრისას აღნიშნა, ლარის გამყარება შემცირებულ რეფინანსირების სესხთან ერთად სავალუტო შემოდინების ზრდასაც უკავშირდება.
საგარეო ვაჭრობისგან განსხვავებით, სადაც საქართველოს დამოუკიდებლობის დღიდან მოყოლებული მუდმივად უარყოფითი სალდო აქვს, ფულად გზავნილებში პირიქითაა. 2021 წლის აპრილში გადმორიცხვებმა გადარიცხვებს $168 მლნ-ით გადააჭარბა, 2022 წლის მარტში $169 მლნ-ით, აპრილში კი $283 მლნ-ით. ანუ წმინდა სავალუტო შემოდინება $115 მლნ-ითაა გაზრდილი.
1-ელ აპრილს აშშ დოლარის ღირებულება 3.09 ლარს შეადგენდა, 30 აპრილს 3.06 ლარს, 17 მაისის ოფიციალური კურსი 2.98-ა. დოლარის სხვა ვალუტებთან გამყარების ფონზე ლარი ევროსთან და გირვანქასთან კიდევ უფრო მეტად გამყარდა, თუ 9 თებერვალს 1 აშშ დოლარის ფასი 2.92 ლარი იყო, მაშინ ევრო 3.33, ხოლო გირვანქა 3.96 ლარი ღირდა. დღეს ევროს ფასი 3.10 ლარამდე, გირვანქის 3.64 ლარამდეა შემცირებული.
ეროვნული ბანკის სტატისტიკით აპრილში რუსეთის მოქალაქეებმა საქართველოში $36.5 მლნ დახარჯეს და მისმა წილმა საერთაშორისო მოგზაურებიდან მიღებულ შემოსავლებში 19.3% შეადგინა. გასული წლის ანალოგიურ პერიოდში კი რუსეთის წილი 15.5%-ს შეადგენდა.
ტურიზმის ეროვნული ადმინისტრაციის ცნობით აპრილში საქართველოს საზღვარი რუსეთის 33 556-მა მოქალაქემ გადმოკვეთა, რაც ვიზიტორების ჯამური მაჩვენებლის 15.6%-ა. 2021 წლის აპრილში რუსეთის მოქალაქეების წილი ვიზიტორების საერთო რაოდენობაში 10.3%-ს შეადგენდა.
რუსეთის უკრაინაში შეჭრის პირველივე დღეებიდან საქართველოში რუსეთიდან შემოსული მოქალაქეების რაოდენობა მკვეთრად გაიზარდა. მიგრანტთა ტალღის ზრდამ ქვეყნის შიგნით რუსეთის მოქალაქეებისთვის სავიზო რეჟიმის ამოქმედების სურვილი გააჩინა, რაც ერთის მხრივ უსაფრთხოებით, მეორე მხრივ კი უკრაინისადმი სოლიდარობით აიხსნებოდა. მოთხოვნის მიუხედავად მთავრობას სავიზო რეჟიმი არ აუმოქმედებია. მარტში ბინის ქირის ფასი ცენტრალურ უბნებში გაორმაგდა და ზოგ შემთხვევაში გასამმაგდა.
ბოლო პერიოდში სოციალური ქსელის მეშვეობით რამდენიმე ადამიანის განცხადება გავრცელდა, რომელთა თქმითაც რუსეთის მოქალაქეებმა ქირის გადახდა შეწყვიტეს, თუმცა სასამართლო გადაწყვეტილების გარეშე მათ ბინიდან პოლიციის ძალით ვერ ასახლებენ.
გიორგი ელიზბარაშვილი