ევროპელი სამართალდამცველების მიერ დაკავებული რუსი ოლიგარქების კუთვნილი იახტების ჯამურმა ღირებლებამ 1,8 მლრდ დოლარს მიაღწია. ამის შესახებ ესპანური გამოცემა El Pais წერს.
გაზეთის ცნობით, ბოლო 5 კვირის განმავლობაში, დასავლური სანქციების ფარგლებში, რომელიც დასავლეთმა რუსეთის ფედერაციას უკრაინაში ომის გამო დაუწესა, სხვადასხვა ევროპულ პორტებში დაკავებულია 12-ზე მეტი სუპერ-იახტა. გაზეთის ვერსიით, მათი ჯამური ღირებულება 1,8 მლრდ დოლარს აღწევს.
შეგახსენებთ, ცოტა ხსნის წინ ესპანეთმა FBI-ის მითითებით ვიქტორ ვეკსელბერგის იახტა დააკავა. მანამდე, ისევ ესპანეთში დააკავეს რუსი ოლიგარქის იგორ სეჩინის სუპერ-იახტა, რომელიც ექსპერტების მიერ 493 მილიონ აშშ დოლარადაა შეფასებული. ესპანეთშივე დააკავეს 140 მლნ დოლარად შეფასებული ასევე რუსი ოლიგარქის კუთვნილი იახტა. მანამდე კი იტალიის ხელისუფლებამ რუს ოლიგარქს, ანდრეი მელნიჩენკოს დაახლოებით 578 მილიონი აშშ დოლარის ღირებულების იახტა ჩამოართვა. ასევე დიდმა ბრიტანეთმა, რუსეთის წინააღმდეგ სანქციების ფარგლებში, საკუთარ წყლებში პირველი სუპერიახტის კონფისკაცია მოახდინა.
ამასთან, რუსი მილიარდერების საკუთრებაში არსებული, იახტების ნაწილი ინდოეთის ოკეანეში მალდივებზე გადამალეს. მალდივები კუნძულოვანი ქვეყანაა და შეერთებულ შტატებთან ექსტრადიციის ხელშეკრულება არ აქვს. გადამალულ იახტებს შორისაა სუპერიახტა The Clio, რომელიც ალუმინის გიგანტ Rusal-ის დამფუძნებელ ოლეგ დერიპასკას ეკუთვნის. ასევე სუპერიახტა Titan, რომელსაც ფოლადის მწარმოებელი კომპანია Evraz-ის თანადამფუძნებელი, ალექსანდრე აბრამოვი ფლობს. მათ შორის არის ასევე 88-მეტრიანი Nirvana, რომელიც რუსეთის უმდიდრეს ადამიანს, ვლადიმერ პოტანინს ეკუთვნის. წლის დასაწყისში ოლიგარქების ამ იახტების უმეტესობა ახლო აღმოსავლეთის პორტებში მოძრაობდნენ.
გადამალული იახტების რიცხვშია რუსეთის პრეზიდენტ ვლადიმირ პუტინის კუთვნილი 82-მეტრიანი იახტა - Graceful, რომელიც „გაიტაცეს“ ჰამბურგის პორტიდან და გადამალეს. აღნიშნული იახტა 2014 წელს, თითქმის, 87 მლნ ევროდ აშენდა და ბოლო რამდენიმე თვე ჰამბურგში იყო.
იახტები
