ფორსმაჟორი - სტიქიური მოვლენები, გაფიცვები, საბოტაჟი ან სხვა საწარმოო არეულობა, სამოქალაქო მღელვარება, ომი, ბლოკადა, აჯანყება, მიწისძვრა, მეწყერების ჩამოწოლა, ეპიდემია (პანდემია), წყალდიდობა და სხვა მსგავსი მოვლენები, რომელიც არ ექვემდებარება მხარეთა კონტროლს და რომელთა თავიდან აცილებაც მათ მიერ შეუძლებელია.ამ დროს მხარეებს შორის ხელშეკრულების შესაბამისად გადასახდელ თანხაზე გათვალისწინებული შეღავათები ვრცელდება.

ყველა საბანკო ხელშეკრულებაში აღნიშნულია,რომ მხარეები თავისუფლდებიან პასუხისმგებლობისგან ვალდებულებების სრული და ნაწილობრივი შეუსრულებლობისათვის დაუძლეველი ძალის-ფორს-მაჟორის მოქმედების პერიოდში,თუ მისი მიზეზით შეუძლებელია წინამდებარე ხელშეკრულებით გათვალისწინებული ვალდებულებების შესრულება/ან ჯეროვანი შესრულება.

აღსანიშნავია,რომ გუშინ საქართველოს პრემიერ-მინისტრმა გიორგი გახარიამ ეკონომიკური გუნდის, ეროვნული ბანკისა და საბანკო სექტორის წარმომადგენლებთან, ეკონომიკური სტიმულირების გეგმა განიხილა. საბანკო სექტორმა კოორდინირებულ რეჟიმში თანამშრომლობისთვის მზადყოფნა გამოთქვა და მსესხებლებისთვის საშეღავათო პერიოდის შეთავაზება აქტიურად დაიწყო.

თუმცა, არის თუ არა სესხების შენატანზე სამთვიანი საშეღავათო პერიოდის დაწესება საბანკო სექტორის კეთილი ნება და არა ხელშეკრულებით განსაზღვრული ვალდებულება, ამ თემასთან დაკავშირებით „კომერსანტი“ იურისტს კობა ბოჭორიშვილს ესაუბრა.

„ერთმნიშვნელოვნად შეგვიძლია ვთქვათ, რომ ეპიდემია შეიძლება იქნეს მიჩნეული ფორსმაჟორულ სიტუაციად, მაგრამ ვალდებულებით ურთიერთობაში თუ ჩვენ მივიჩნევთ, რომ საქართველოში ეპიდემია ან პანდემია არის, უნდა გვქონდეს შესაბამისი ორგანოს მიერ გამოცემული აქტი, რომელიც ამ ეპიდემიის არსებობას დაადასტურებს, რაც ამ ეტაპზე არ გვაქვს. გარდა ამისა, ჩვენ უნდა განვსაზღვროთ როდის მთავრდება და იწყება ეს პროცესი ანუ რა ვადაში ვთავისუფლდები ამ ვალდებულებებისგან და ასევე  მნიშვნელოვანია განისაზღვროს მიშლის თუ არა ეს გარემოება სახელშეკრულებო ვალდებულების შესრულებაში. ბანკებმა სწორი აქცენტი გააკეთეს, რადგან სუბიექტებს სესხები რომ არ გადაეხადათ, დავების უზარმაზარი კორიანტელი დადგებოდა, რაც მათი რეპუტაციის შელახვას გამოიწვევდა და ფინანსურად შესაძლოა ზარალზეც წასულიყვნენ, რადგან ბაჟი, ადვოკატის ხარჯი და სხვა მსგავსი გადასახადები დაეკისრებოდათ. ეს არის კარგი გაანგარიშება და სწორი სვლა, შესაძლოა ბანკები არ დაელოდნენ ოფიციალურად პანდემიის გამოცხადებას და წინდახედულობა გამოიჩინეს, რადგან ეს შედეგი შინაარსობრივად მაინც დადგებოდა“, - განმარტა კობა ბოჭორიშვილმა.

შეგახსენებთ, რომ ჯანმრთელობის მსოფლიო ორგანიზაციამ ახალი კორონავირუსი პანდემიად გამოაცხადა. ამის შესახებ ჯანმრთელობის მსოფლიო ორგანიზაციის გენერალურმა დირექტორმა ტედროს ადჰანომ  ღებრეისუსმა 11 მარტს განაცხადა.