ზაფხულის სეზონის დამთავრებასთან ერთად „კომერსანტი“ ნაყინის მწარმოებელი კომპანიების შედეგებით დაინტერესდა. როგორც აღმოჩნდა, გლობალური პანდემია ყველაზე ნაკლებად სწორედ ამ სფეროს შეეხო.
„კომერსანტს“ კომპანია „პინგოს“ დამფუძნებელმა ვიტალი გელაშვილმა განუცხადა, რომ პროდუქციის რეალიზაციას პანდემიის პერიოდშიც ახერხებდნენ.
„ნაყინის რეალიზაცია სადაც ხდება, ის ობიექტები ფაქტობრივად არ დახურულა. სწორედ ამიტომ იმუშავა ამ სფერომ. ურეკლამოდ ბაზარზე ყოფნის კვალობაზე ჩვენი კომპანიისადმი საკმაოდ მაღალი დაინტერესებაა და ყოველწლიურად 20%-იანი მატება მაინც გვაქვს.“ - განმარტავს ვიტალი გელაშვილი.
როგორც კომპანია „ბარამბოს“ მარკეტინგის მენეჯერი ლევან ყუბანეიშვილი აღნიშნავს, წლის პირველი ნახევარი ბევრად უფრო რთული პერიოდი იყო, თუმცა პანდემიის გარდა ცუდი ამინდების გავლენაზეც საუბრობენ.
„წლის პირველი ნახევარი (მარტი, აპრილი, მაისი) ცოტა რთული იყო. ამაზე პანდემიის გარდა ცუდმა ამინდებმაც იმოქმედა. მეორე ნახევარი (ივნისი, ივლისი, აგვისტო) კი - კარგი. ყოველ შემთხვევაში გეგმა, რომელიც დასახული იყო ამ თვეებში შესრულდა.
საბოლოოდ, თუ განვიხილავთ ზაფხულის ეტაპს გაყიდვების ზრდა იყო, ხოლო გაზაფხულის ეტაპზე კლება გამოიკვეთა, რაზეც ამინდებმაც იმოქმედა. - აცხადებს ლევან ყუბანეიშვილი
კომპანია „თოლია“ პანდემიის გავლენას ძირითადად სანაყინე ქსელის მაღაზიებში გაყიდვების 30%-იანი კლება ჰქონდა.
„წინა წელთან შედარებით, ინდუსტრიული ნაყინის კუთხით 5%-იანი ზრდა გვაქვს. რაც შეეხება სანაყინეების ქსელს, შეზღუდვებმა და რეგულაციებმა დიდი ზეგავლენა მოახდინა. შესაბამისად, ამ კუთხით დაახლოებით 30%-იანი კლება გამოიკვეთა,- განმარტავს „თოლიას“ მარკეტინგის დირექტორი სანდრო ლომთაძე.
ანი ცარციძე