ბორჯომის მხარეთმცოდნეობის მუზეუმმა კორონავირუსის პანდემიის გამო 5000-დან 6000 ლარამდე იზარალა.

როგორც „კომერსანტს“ მუზეუმის დირექტორმა თინათინ მამასტარაშვილმა უთხრა, სხვა მუზეუმების მსგავსად ივნისის თვეში მუშაობის განახლება  ვერ შეძლეს, რადგან ფინანსების არქონის გამო რეგულაციებით გათვალისწინებული ნივთები ვერ  შეიძინეს.

„ბორჯომის მხარეთმცოდნეობის მუზეუმი კულტურული მემკვიდრეობის დაცვის ეროვნული სააგენტოს დაქვემდებარებაშია და როგორც იცით მუზეუმები ამ პერიოდში დაკეტილი იყო, რის გამოც სააგენტოში არანაირი  შემოსავალი არ შედიოდა, შესაბამისად გახსნისთვის საჭირო  ინვენტარის  საყიდლად  თანხა არ იყო, როგორც  მოგეხსენებათ ვარძიამ და  უფლისციხემ ერთი  თვის  წინ  განაახლეს  მუშაობა და აქედან გამომდინარე  შემოსული თანხებით მოხდა  სააგენტოს დაქვემდებარებაში მყოფი მუზეუმების ეტაპობრივად  გახსნა.  ვიზარალეთ  დაახლოებით  5000 ლარიდან  6 000 ლარამდე“, - განმარტა მამასტარაშვილმა.

თინათინ მამასტარაშვილის განცხადებით, წინა წლებში მუზეუმით უფრო მეტად უცხოელი ვიზიტორები ინტერესდებოდნენ, თუმცა ქართველი დამსვენებლების ნაკლებობასაც არ უჩივიან და დაინტერესება ქართველების მხრიდან წელსაც დიდია.

მუზეუმის დირექტორმა  „კომერსანტთან“ ასევე მუზეუმის რეაბილიტაციაზეც ისაუბრა. მუზეუმის რეაბილიტაცია 2020 წლის ივნისიდან უნდა დაწყებულიყო თუმცა ფინანსების არ ქონის გამო გადაიდო და ამ  ეტაპზე მოლაპარაკებები მიმდინარეობს ადგილობრივ მუნიციპალიტეტთან, გუბერნიასა და IDS ბორჯომის  წარმომადგენლებთან.

რეაბილიტაციის დროს ბორჯომის მხარეთმცოდნეობის მუზეუმის ექსპონატებს, ბორჯომის ცენტრალურ პარკში არსებულ მინერალური წყლის საექსპორტო შენობაში განათავსებენ.

„სააგენტოს სურდა, რომ შენობა რომელშიც მუზეუმი დროებით უნდა გადასულიყო IDS ბორჯომის დაფინანსებით გაკეთებულიყო, ამ შენობის გაკეთების შემდეგ ბორჯომის მხარეთმცოდნეობის მუზეუმი დროებით გადაიტანდა ექსპონატებს და შემდეგ დაიწყებოდა მუზეუმის ისტორიული შენობის რეაბილიტაცია, თუმცა ამ ეტაპზე მოლაპარაკებები მიმდინარეობს“, - განაცხადა მამასტარაშვილმა.

მხარეთმცოდნეობის მუზეუმში რეაბილიტაციისთვის საჭირო კონკრეტულ თანხას ვერ ასახლებენ თუმცა თინათინ მამასტარაშილის განცხადებით რამდენიმე მილიონზეა საუბარი.

თაკო კვაჭანტირაძე