„გაყიდვების მაჩვენებელი უძრავი ქონების ბიზნესში იმდენადაა შემცირებული, რომ შეუძლებელია ეს მხოლოდ ფინანსურ პრობლემებს უკავშირდებოდეს. მათ ვისაც გადაწყვეტილი ჰქონდა ჩვენთან ბინის შეძენა, ისინი მხოლოდ ხელფასზე არ არიან დამოკიდებული, ერთი და ორი თვე მათ ფინანსებს ასე თავდაყირა ვერ დააყენებდა. უბრალოდ ვიმედოვნებ, რომ ახლა ფულის ხარჯვის პროცესი დროებით შეჩერდა,“ - ამის შესახებ „კომერსანტს“ დეველოპერული კომპანია „რედკოს“ იურისტმა მალხაზ კუნელაურმა განუცხადა.
კომპანია „რედკომ“ გუდაურის განვითარების პროცესი ცოტა ხნის წინ განაახლა. როგორც ცნობილია დეველოპერული კომპანია პროექტ „ახალი გუდაურის“ ფარგლებში სასტუმროს ტიპის საცხოვრებელ სახლებს აშენებს, ასევე ადგილზე მიმდინარეობს რედისონის ბრენდის სასტუმროს მშენებლობაც. 2019 წელს „რედკომ“ სამშენებლო სამუშაოების შესრულება სამშენებლო კომპანია „ანაგს“ გადააბარა, რომელიც, მათი თქმით, პასუხისმგებელია „რადისონ ბლუ გუდაურის“ და სხვა პროექტების მშენებლობასა თუ ხარისხზე.
„გუდაურში საგანგებო მდგომარეობისა და კლიმატის გამო სამუშაოები შეჩერებული იყო. ამჟამად, ჩვენი კონტრაქტორი კომპანია „ანაგი“ ადგილზე იმყოფება და იმ პროქტებს, რომელიც ზამთრის პერიოდში შეჩერებული იყო, კვლავ განაახლებს. მშენებლობის პროცესს ხელს არაფერი უშლის, თუმცა მოთხოვნა ძალიან რთულად პროგნოზირებადია. არსებული სიტუაციიდან გამომდინარე ბაზარზე ერთგვარი შიშის სინდრომი გაჩნდა. ამიტომაც, საცხოვრებელი სახლების გაყიდვებისა და დაინტერესების მაჩვენებელი ჩვენთან 95 პროცენტით დაეცა.
რაც შეეხება სასტუმროს - „რედისონის“ ხუთვარსკვლავიანი სასტუმროს მშენებლობა ჩვეული გრაფიკით მიმდინარეობს და ვეცდებით რომ, მალე გავხსნათ. მთავარია პესიმისტურად არ განვეწყოთ და არ შევაჩეროთ პროცესები,“ - აღნიშნა მალხაზ კუნელაურმა.
ამასთან ზაფხულის შუა რიცხვებში კომპანია თბილისში, კერძოდ კრწანიში, ბრიტანეთის საელჩოს გვერდით, საცხოვრებელი დანიშნულების ახალ მოცულობით პროექტს იწყებს.
ცოტა ხნის წინ კი „რედკოს“ იურისტმა „კომერსანტთან“ ციხისძირის ახალი სასტუმრო და საცხოვრებელი კომპლექსის Bamboo Beach Resort-ის მშენებლობის დაწყება დააანონსა.
მარიამ მორგოშია