რადიო „კომერსანტის“ დილის ეთერში, უძრავი ქონების ბაზრის ექსპერტმა გურამ ძებისაშვილმა, რომელიც მრავალი წელია კანადაში ცხოვრობს, პანდემიის შემდეგ კანადის უძრავი ქონების ბაზრის მიმოხილვა გააკეთა. მისი თქმით, პანდემიის დროს კანადის უძრავი ქონების ბაზარზე „ჯერ ყველაფერი გაიყინა, მერე კი ფასები 50%-მდე გაიზარდა.“

„პიკი შარშან იანვარ-თებერვალში გვქონდა. მაშინ უძრავ ქონებაზე ფასები დაახლოებით 50%-ით გაიზარდა. ეს ძალიან არასასიამოვნო სიურპრიზი იყო. ბევრი პანიკამ მოიცვა. ამის შემდეგ, რაღაც პერიოდი საერთოდ შევაჩერეთ ტრანზაქციები. ვერავინ ვერაფერს ყიდდა და ყიდულობდა, მერე ნელ-ნელა თვეების განმავლობაში ბაზარი გამოცოცხლდა, მაგრამ ფასებმა ყოველკვირეულად განაგრძობდა ზრდას,“ - იხსენებს გურამ ძებისაშვილმა.

მისი თქმით, ისევე როგორც ევროპასა და ამერიკაში, კანადაშიც მაღალი ინფლაციაა. ადრე თუ 120 კვ მ-ის ფართობის სახლი 80 000 კანადური დოლარი ღირდა, ახლა 800 000 ღირს.

„რაც შეეხება კომერციულ ფართებს, პანდემიის დროს ოფისები დაცარიელდა, ქირას ვეღარ იხდიდნენ, ვერც ყიდდნენ და იმის შიში იყო, რომ ყოველთვის ასე იქნებოდა. კარგია რომ ეს არ გამართლდა. ჩვენთან დიდი კომპანიების - Google-ის და IT კომპანიების ოფისებია და ხელმძღვანელები ცდილობენ, რომ თანამშრომლები ოფისებში დააბრუნონ,“ - გვითხრა გურამ ძებისაშვილმა.

მისი თქმით, კანადაში უძრავი ქონების შეძენის ძირითადი გზა საბანკო სესხია და საპროცენტო განაკვეთი აქაც გაზრდილია.

„ინფლაციამ 6%-ს მიაღწია. თუ პანდემიამდე ადამიანი იპოთეკურ სესხში 3 000-ს იხდიდა, დღეს 5 000 იხდის და ეს უზარმაზარი სხვაობაა,“ - ამბობს გურამ ძებისაშვილი.

მისი თქმით, კანადაში ყველაზე დიდი მოთხოვნა IT სპეციალისტებზეა, მათ შორის ემიგრანტ IT სპეციალისტებზე. მათ უფრო უიოლდებათ ქვეყანაში დასაქმება და შემდეგ მოქალაქეობის მიღება. გურამ ძებისაშვილმა ისიც თქვა, რომ IT სპეციალისტებთან ერთად, კანადაში დიდი მოთხოვნაა სატვირთო მანქანების მძღოლებზეც. „მშენებლებზე ნაკლები მოთხოვნაა, რადგან ქვეყანაში ამ დარგის სპეციალისტები საკმარისად ჰყავთ“, — აცხადებს გურამ ძებისაშვილი

მოამზადა მაკა ბიბილაშვილმა