ტექნიკის მაღაზიები 2020 წელს ჯერ გაზაფხულზე და შემდეგ დეკემბერში, სამ თვეზე მეტი ხნის განმავლობაში, დაკეტილი იყო, თუმცა ალტას, ელიტ ელექტრონიქსისა და ზუმერის გაყიდვები მაინც გაიზარდა.
2020 წელს ალტამ 2019 წელთან შედარებით 8.8%-ით მეტი — 271 მლნ ლარის შემოსავალი მიიღო. პანდემიური წლის მიუხედავად, კიდევ უფრო შთამბეჭდავი იყო წმინდა მოგების ზრდა. წმინდა მოგებამ 14.6 მლნ ლარს მიაღწია, რაც 2019 წლის მაჩვენებელს 134%-ით აჭარბებს.
ალტას მსგავსად 2.8%-ით 182 მლნ ლარამდე გაიზარდა ელიტ ელექტრონიქსის შემოსავალიც, წმინდა მოგება კი 274%-ით 4.7 მლნ ლარამდე.
ტექნიკის მაღაზიათა კიდევ ერთმა მსხვილმა ქსელმა - ზუმერმა შემოსავალი 4.8%-ით 176 მლნ-მდე გაზარდა. 96%-ით გაიზარდა მისი წმინდა მოგებაც.
„ალტა“ 1998 წელს დაარსდა. 2016 წლის 11 მაისს შპს „ალტამ“ და შპს „ოქეიმ“ დააფუძნეს ერთობლივი საწარმო შპს „ალტაოქეი“. 2019 წლის 15 ივლისს შპს ალტამ შეიძინა შპს ალტაოქეის 50%-იანი წილი შპს ოქეისგან და გახდა კომპანიის 100%-იანი წილის მფლობელი. შპს ალტაოქეის კი შეეცვალა სახელწოდება და დარეგისტრირდა, როგორც შპს „ალტა რითეილი“. დღეს კომპანია 5 ქალაქში: თბილისი, რუსთავი, გორი, ქუთაისი, ბათუმი 12 მაღაზიითაა წარმოდგენილი. ალტა ასევე ფლობს „მეტრო-მარტის“ 50%-იან წილს, რომელიც, თავის მხრივ, იმავე 5 ქალაქში 6 მაღაზიითაა წარმოდგენილი.
ალტა იმპორტირებულ ელექტრო ტექნიკას ყიდის როგორც საცალო და საბითუმო ქსელში, ასევე კორპორაციულ მომხმარებლებზეც. პროდუქციის ძირითადი ხაზი სმარტფონები, ლეპტოპები და ტელევიზორებია. თუმცა ჩამონათვალში ასევე შედის: მაცივარი, სარეცხი მანქანა, კონდიციონერი, გაზქურა და სხვა საყოფაცხოვრებო ტექნიკა.
2020 წლის 31 დეკემბრის მდგომარეობით ალტაში 567 ადამიანი იყო დასაქმებული.
„ელიტ ელექტრონიქსი“ 2005 წელს შპს-ს ფორმით დაარსდა, 2007 წელს კი სააქციო საზოგადოებად ტრანსფორმირდა. კომპანია საქართველოში 17 საკუთარ და 5 ფრანჩაიზული ტიპის მაღაზიას ფლობს. მათ შორის 5-ს თბილისში და 2-ს ბათუმში. დასაქმებულთა რაოდენობა 570-ს შეადგენს.
კომპანიის 51%-იან წილს შპს „დიჯითალ ეიჯი“ ფლობს, დარჩენილ 49%-იან წილს კი შპს „სის ინთეგრეიშენი.“ ორივე მათგანი ისრაელშია რეგისტრირებული. 2009 წლიდან „ელიტ ელექტრონიქსი“ რეაბილიტაციის პროცესში იმყოფება, რომლის დასრულებაც 2022 წელსაა დაგეგმილი.
2020 წლის 31 დეკემბრის მდგომარეობით ელიტ ელექტრონიქსში 650 ადამიანი იყო დასაქმებული.
სხვა ქსელური მაღაზიებისგან განსხვავებით „ზუმერი“ ძირითადად სმარტფონებზეა ორიენტირებული.
„ზუმერმა“ ოპერირება 2009 წელს თბილისში 1 ფილიალით დაიწყო და მხოლოდ საბითუმოდ ვაჭრობდა. საცალო ბაზარზე კი 3 წლის შემდეგ გავიდა. ამჟამად კომპანია თბილისში, ქუთაისში, ბათუმში, რუსთავში, ზუგდიდში, თელავსა და ახალციხეში 17 მაღაზიას ფლობს. სმარტფონების გარდა გასაყიდ პროდუქციის ჩამონათვალში შედის ასევე: ლეპტოპები, ფოტოაპარატები, აუდიო-ვიდეო ტექნიკის აქსესუარები...
მცირე მაღაზიების სპეციფიკიდან გამომდინარე, ქსელში მხოლოდ 250 ადამიანია დასაქმებული.
გიორგი ელიზბარაშვილი