სოლოლაკის ქედზე „მარიოტის“ საერთაშორისო ქსელის უმაღლესი კლასის Autograph Collection-ის ბრენდის 5-ვარსკვლავიანი სასტუმრო და საკონფერენციო ცენტრის, მწვანე კონცხზე გამაჯანსაღებელი კომპლექსის, „პარაგრაფი აბასთუმანის“ და განმუხურში სასტუმროს გახსნას ტურიზმის განვითარების ფონდი, რომელიც დღეს „ქართუ ფონდში“ შემადგენლობაშია, წელს გეგმავდა.

„კომერსანტი“ დაინტერესდა რა ეტაპზე ბიძინა ივანიშვილის მიერ 2020 წელს ფონდ „ქართუსთვის“ გადაცემული მნიშვნელოვანი პროექტების მშენებლობა და რატომ გადაიდო, თანაც არაერთხელ მათი დასრულების ვადები.

ტურიზმის განვითარების ფონდში „კომერსანტს“ უთხრეს, რომ ყველაზე მთავარი და მნიშვნელოვანი სიახლე, რაც უახლოეს პერიოდში ფონდისთვის პრიორიტეტული იქნება არის Luxury Collection-ის ბრენდის სასტუმროს „პარაგრაფ თბილისის“ წელს გახსნა, რაც შეეხება დანარჩენ პროექტებს, ვადები შეიცვალა მსოფლიოში არსებული ეპიდვითარებიდან გამომდინარე, რამაც საკმაოდ უარყოფითი გავლენა იქონია სასტუმრო ინდუსტრიის სფეროზე.

„პროექტების მშენებლობის და გახსნის ვადები შეიცვალა ეპიდვითარებიდან გამომდინარე. მსოფლიო ბაზარზე არსებული გამოწვევები ჩვენზეც მნიშვნელოვნად აისახა რის გამოც მოგვიწია პროექტების გახსნის ვადების ცვლილება. ამ ეტაპზე მიმდინარეობს მუშაობა, პროექტების კონცეფციის დახვეწის მიმართულებით, რისი გასაჯაროების მიზნობრიობას ამ ეტაპზე ვერ ვხედავთ. ჩვენი სრული ყურადღება ამ ეტაპზე მიპყრობილია „პარაგრაფ თბილისის“ წარმატებით გახსნისაკენ“, — აღნიშნავენ ფონდში.

პანორამა-თბილისი, რომელიც რამდენიმე პროექტს აერთიანებს, ერთ-ერთი ყველაზე უფრო მეტად გახმაურებული, მასშტაბური, ძვირადღირებული და ხანგრძლივი ისტორიის მქონე პროექტია. პროექტის შესახებაც პირველად 2014 წელს, ჯერ კიდევ გიგი უგულავას მერობის პერიოდში გახდა ცნობილი. მთელი ამ პერიოდის განმავლობაში ჯამური საინვესტიციო ღირებულების მოცულობა, დასრულების ვადა და უშუალოდ პროექტის დეტალები რამდენჯერმე შეიცვალა. თავდაპირველად კომპლექსისთვის 4 წერტილი შეირჩა: თავისუფლების მოედანზე ყოფილი ცეკავშირის შენობა, ერეკლე მეორის მოედანზე მდებარე ქარვასლა, სოლოლაკის ქედი და თაბორის მთა. საინვესტიციო ღირებულებად $600 მლნ დასახელდა. ითქვა ისიც, რომ პროექტი 3 წელიწადში დასრულდებოდა, თუმცა დღეს პროექტების კონცეფციის, ვადების და საინვესტიციო მოცულობის ცვლილება იგეგმება.

რაც შეეხება აბასთუმანში მარიოტის უმაღლესი კლასის Autograph Collection-ის ბრენდის სასტუმროს „პარაგრაფ აბასთუმანს“, მისი საინვესტიციო მოცულობა 76 მლნ დოლარამდე, ხოლო დასრულების თარიღი 2025 წლამდე შეიცვალა. 

მშენებლობის პროცესშია კიდევ ერთი მარიოტის ქსელის Luxury Collection-ის ბრენდის 120 ნომრიანი სასტუმრო და გამაჯანსაღებელი კომპლექსი მწვანე კონცხზე, სადაც გეგმის მიხედვით სპა, აუზი, ფიტნეს ცენტრი, რესტორანი, ლაუნჯ ბარი, ჩოგბურთის, ფეხბურთის და კალათბურთის მოედნები, საბავშვო - სარეკრიაციო ზონა და ბიზნეს შეხვედრებისთვის საჭირო საკონფერენციო სივრცეები უნდა განთავსდეს. მისი საინვესტიციო ღირებულება $70 მლნ-ს შეადგენს.

ანაკლიასთან ახლოს მიმდინარეობს მარიოტის საერთაშორისო ქსელის, Tribute Collection-ის ბრენდის სასტუმროს მშენებლობაც. სასტუმროში, სადაც 160 ნომერი განთავსდება, თავმოყრილი იქნება აუზი, სპა, სატრენაჟორო დარბაზი, ჩოგბურთის და კალათბურთის მოედნები, რესტორანი, ლაუნჯ ბარი და მისი ინვესტიცია 45 მლნ დოლარია.