ამერიკაში მოღვაწე ქართველი ექიმი ზურაბ გურული სოციალურ ქსელში, 7-9 მარტის აქციების მონაწილე, ლაზარე გრიგორიადისის პატიმრობას ეხმაურება და წერს, რომ ყველა ის საპროტესტო ქმედება, რომელიც გამოიწვია ე.წ. აგენტების კანონპროექტის ნაჩქარევად დანერგვის მცდელობამ, იყო პროვოცირებული საქართველოს პარლამენტის მიერ და მის მიერ პროვოცირებულ პროტესტში მონაწილე მოქალაქეთა სამართლებრივი დევნა ანტიკონსტიტუციური აქტია.
„პარლამენტარ მეგრელიშვილს და „კომპანიონებს", რომლებიც კანონისა და სამართლის მოხმობით ვიშვიშებენ ლაზარეს „დანაშაულზე", ოფიციალური იურიდიული ენით:
1. საქართველოს პარლამენტის მიერ ე.წ. „აგენტების კანონის" მიღების მცდელობა იყო ანტიკონსტიტუციური აქტი, ვინაიდან ევროპულ ოჯახში გაერთიანება არის საქართველოს კონსტიტუციაში ჩაწერილი ოფიციალური ეროვნული, სახელმწიფო მიზანი და ევროკავშირის ყველა წამყვანმა ქვეყანამ მიუთითა საქართველოს პარლამენტს, რომ ამ კანონის მიღება მკვეთრად დაარღვევდა ევროპული დემოკრატიის სტანდარტებს.
2. როდესაც სახელმწიფოს რომელიმე ინსტიტუტი შეგნებულად არღვევს კონსტიტუციას, მოქალაქეებს აქვთ სამართლებრივი უფლება და მოვალეობა რომ დაიცვან კონსტიტუცია ყველა შესაძლო მეთოდით, მათ შორის აჯანყებით. მოქალაქეთა პროტესტი იყო კანონიერი.
3. საქართველოს პარლამენტმა ოფიციალურად აღიარა, რომ მათ მიერ რეკომენდებული კანონპროექტი არ იყო ადეკვატურად მომზადებული და წარდგენილი და უკან გაიწვია. ამ აღიარების თანახმად ყველა ის საპროტესტო ქმედება, რომელიც გამოიწვია ამ მოუმზადებელი კანონპროექტის ნაჩქარევად დანერგვის მცდელობამ, იყო პროვოცირებული საქართველოს პარლამენტის მიერ და სწორედ პარლამენტს ეკისრება სრული და უპირობო პასუხისმგებლობა აბსოლუტურად ყველა ძალადობრივ პროვოკაციაზე.
4. საქართველოს პარლამენტის მიერ პროვოცირებულ პროტესტში მონაწილე მოქალაქეთა სამართლებრივი დევნა არის ანტიკონსტიტუციური აქტი და ეწინააღმდეგება როგორც საქართველოს კონსტიტუციას, ასევე საერთაშორისო დემოკრატიის უზენაეს სტანდარტებს“, - წერს ზურაბ გურული.
შეგახსენებთ, ლაზარე გრიგორიადისს, რომელსაც გამოძიება 7-9 მარტის აქციებზე „მოლოტოვის კოქტეილების” სროლას და პოლიციელის მანქანის დაწვას ედავება, მოსამართლემ 31 მარტს წინასწარი პატიმრობა შეუფარდა.