აზერბაიჯანული კომპანია „პაშა ჰოლდინგი“ საქართველოში სტუმარ-მასპინძლობის სექტორში შედის. თბილისის ისტორიულ უბანში, დოდო აბაშიძის ქუჩაზე ბანკს და სასტუმრო კომპლექსს ააშენებს.  „კომერსანტის“ ინფორმაციით, 7823 კვ.მ „პაშა დეველოპმენტ ჯორჯიამ“ 2015 წელს სახელმწიფოსგან ელექტრონულ აუქციონზე $ 3,555 მლნ–დ იყიდა. პროექტის დეტალებზე კომპანიაში ამ ეტაპზე საუბარი არ სურთ.

როგორც მედიაჰოლდინგმა გაარკვია, მრავალფუნქციური კომპლექსი ორი, ა და ბ ბლოკისგან შედგება. ა ბლოკი ბანკის ნაწილი 5–სართულიანია, ხოლო ბ ბლოკი სასტუმროს ნაწილი 8–სართულიანი. ორივე შენობის ფასადები სრულიად შემინულია. კომპლექსის ესკიზი დედაქალაქის მთავრობასთან უკვე შეთანხმებულია. „პაშა დეველოპმენტ ჯორჯია“ ახლა მშენებლობის ნებართვას ელოდება.

სასტუმროში 152 ნომერი განთავსდება, რომლებიც 2,3,4,5,6,7 და 8 სართულებზე განაწილებულია. კომპლექს მიწისქვეშ 2 სართული გააჩნია. სასტუმროს ნაწილის პირველ სართულზე განთავსებულია შემოსასვლელი ლობი, ბარი, ლაუნჯი, რესტორანი. პირველი სართულის ანტრესოლი თითქმის სრულიად დაეთმო შეხვედრებისთვის განკუთვნილ სივრცეებს. მე-8- ე სართულზე, გარდა სასტუმროს ნომრებისა, აგრეთვე განთავსებულია მცირე სავარჯიშო დარბაზი და ბარ-რესტორანი ღია ტერასით.

ბანკის ნაწილის 1,2,3 და 4 სართულებზე განთავსებულია საოფისე სივრცეები - როგორც ღია სამუშაო სივრცეები, აგრეთვე დახურული ოთახები. ხოლო მე-5 სართულზე არის საკონფერენციო სივრცე და ტერასა.

აღსანიშნავია, რომ „პაშა ჰოლდინგი“ სხვადასხვა ქვეყანაში უძრავი ქონების ბაზარზე წლებია ოპერირებს, შეძლებს თუ არა აზერბაიჯანული კომპანია ჰორეკა მიმართულების გეოგრაფიულ გაფართოვებას, ამას უახლოეს მომავალში გავიგებთ.

ბაჩო ადამია