საქართველოში პირველ ციფრულ ბანკს „პეისერა საქართველოს“ საბანკო საქმიანობის განხორციელება 4 თვის ნაცვლად 7 თვის მანძილზე შეეზღუდა. ინფორმაცია საქართველოს ეროვნული ბანკის ვიცე-პრეზიდენტის განკარგულებაშია აღნიშნული.
„დოკუმენტაციის წარმოდგენისა და საქართველოს ეროვნული ბანკის მიერ თანხმობის გაცემამდე სს „პეისერა საქართველოს“ შეეზღუდოს ამ განკარგულების ძალაში შესვლიდან 7 (შვიდი) თვის მანძილზე რეალურ გარემოში საბანკო საქმიანობის განხორციელება“, — ნათქვამია განკარგულებაში.
2022 წლის 17 ნოემბერს საქართველოს ეროვნულმა ბანკმა სს პეისერა საქართველოზე, ციფრული ბანკის ლიცენზირების პრინციპების გათვალისწინებით საბანკო საქმიანობის ლიცენზია გასცა.
სს პეისერა საქართველოს ბიზნეს მოდელი ევროკავშირის ფინანსურ სისტემასთან ინტეგრაციას ეფუძნება და მომხმარებლებისთვის ინოვაციური ციფრული პროდუქტების შეთავაზებას გულისხმობს. ციფრული მოდელის გათვალისწინებით, პეისერა საქართველოს მომსახურებით სარგებლობა შესაძლებელი იქნება დისტანციურად ფილიალებისა და სერვის ცენტრების გარეშე.
ეროვნული ბანკის მიერ შემუშავებული ციფრული ბანკის ლიცენზირების პრინციპების თანახმად, აპლიკანტის ბიზნეს მოდელისა და კანონმდებლობით დადგენილ მოთხოვნებთან შესაბამისობის შეფასების შემდგომ, საბანკო ლიცენზია გარკვეული შეზღუდვებით გაიცემა, ხოლო ციფრული ბანკის სრულად გამართვისა და საზედამხედველო კაპიტალის მინიმალური ოდენობის მოთხოვნის ეტაპობრივად შევსებისთვის ვადა განისაზღვრება.
საჯარო რეესტრის მონაცემების მიხედვით, კომპანიამ 2022 წლის აგვისტოში იურიდიულ-სამართლებრივი ფორმა შეიცვალა და შპს-დან სს-დ გადაკეთდა, 1 მლნ კაპიტალით. მონაცემების მიხედვით, სს „პეისერა საქართველოს“ დირექტორატში არიან გიორგი ჩრდილელი, დიმიტრი ქუმსიშვილი და ირაკლი თოიძე. თავად შპს პეისერა საქართველო 2022 წლის მარტში დაფუძნდა, კომპანიის 40-40%-ს ირაკლი ვეკუა და დიმიტრი ქუმსიშვილი ინაწილებდნენ, 20%-იანი კი ირაკლი თევდორაშვილს ეკუთვნოდა.
თავდაპირველი ინფორმაციით, სს პეისერა საქართველოს საბანკო საქმიანობის ლიცენზიის მიღებიდან 4 თვის მანძილზე სატესტო რეჟიმში უნდა ემუშავა და რეალურ გარემოში საბანკო საქმიანობის განხორციელება შეზღუდული ექნებოდა, თუმცა ახალი განკარგულებით ეს ვადა 7 თვემდე გაგრძელდა. საბანკო საქმიანობების რეალურ რეჟიმში განხორციელების უფლებამისილების მინიჭება, სალიცენზიო მოთხოვნების შესრულების კვალდაკვალ და საქართველოს ეროვნული ბანკის მიერ გაცემული თანხმობის საფუძველზე, ეტაპობრივად მოხდება.