ამერიკული Pfizer Inc. მოელის, რომ გაყიდოს COVID-19-ის ვაქცინა, რომელიც BioNTech SE-თან თანამშრომლობითაა შემუშავებული, ერთი დოზა 110-დან 130 დოლარამდე. ამის შესახებ The Wall Street Journal-ს ფარმაცევტული კომპანიის წარმომადგენელმა ანგელა ლუკინმა განუცხადა.

მისი თქმით, Pfizer კვლავ აწარმოებს მოლაპარაკებებს აშშ-ს ჯანმრთელობის დაზღვევის კომპანიებთან და ელოდება, რომ ისინი დასრულდება იმით, რომ მხარეები დაეთანხმებიან ამ ფასების დიაპაზონს.

კომპანია გეგმავს ვაქცინების გაყიდვას დისტრიბუტორების მეშვეობით, ისევე როგორც ეს სხვა მედიკამენტებთან მიმართებაში ხდება. ამავდროულად, Pfizer შეფუთავს და გაყიდის ვაქცინას ერთ დოზით და არა რამდენიმე დოზიანი შეფუთვით, როგორც ეს იყო პანდემიის დროს.

ლუკინმა ასევე აღნიშნა, რომ კომპანია ვერ შეძლებს ვაქცინების გაყიდვას 2023 წლის დასაწყისამდე. ეს დიდწილად დამოკიდებულია იმაზე, თუ როდის იწურება მიმდინარე კონტრაქტები აშშ-ს მთავრობასთან და როდის გაიყიდება უკვე წარმოებული ყველა დოზა.

Pfizer-ი მიიჩნევს, რომ მომხმარებელთა უმეტესობას არ მოუწევს დამატებითი თანხის გადახდა ვაქცინაციისთვის, რადგან ეს იქნება მათი ჯანმრთელობის დაზღვევის პაკეტის ნაწილი გრიპის საწინააღმდეგო აცრასთან ერთად.

ამერიკელებს კვლავ შეუძლიათ კორონავირუსის საწინააღმდეგო ვაქცინაცია უფასოდ ფედერალური პროგრამის ფარგლებში. 

აშშ-ს ხელისუფლებამ მოსახლეობა ადრე გააფრთხილა, რომ პანდემიის შემდეგ, COVID-19-ის ვაქცინების კომერციალიზაცია მოხდებოდა, ისევე როგორც სხვა მედიკამენტების.