„ეს ვერ იქნება შვება სექტორისთვის, თუმცა სავარაუდოდ, ეს არის დაწერილი ქულები სასტუმროების მფლობელებთან“, - ამის შესახებ ტურისტული კომპანიის „ტრეფიკ თრეველის“ მმართველმა პარტნიორმა რადიო „პალიტრასა“ და „პალიტრანიუსის“ გადაცემაში „საქმე“ ტურისტული სექტორისთვის 2021 წლის ქონების გადასახადის ჩამოწერის შეფასებისას განაცხადა.
მისი თქმით, რეალური ნაბიჯები სექტორის დასახმარებლად არ გადადგმულა და ამ შეღავათით ვერ ისარგებლებენ ისინი, ვინც სფეროს მთავარი კონტრიბუტორები არიან.
„ტურისტული კომპანიების დიდი ნაწილი, არავითარ განსაკუთრებულ ქონებას არ ფლობს. ოფისი ნაქირავები გვაქვს როგორც წესი, არ ვფლობთ სასტუმროებს, ავტომობილებს და შენობებს. ჩვენს სექტორში ეს მხოლოდ სასტუმროებისა და რესტორნებისთვის იქნება შეღავათი. ჩვენთვის ეს არაფერს ნიშნავს.
2020 წლიდან ვითხოვდით საშემოსავლო გადასახადის ჩამოწერას, რაც ნაწილობრივ მოხდა, თუმცა 2020 წლის გადასახადის ნაწილი დაგვერიცხა. ჩვენი კომპანიის შემთხვევაში, არა ერთხელ ავხსენით და მივმართეთ, თუ რა ოდენობის გადასახადს ვიხდიდით წლების განმავლობაში პატიოსნად, რა თანხა შემოგვქონდა უცხოური ვალუტის სახით ქვეყანაში და რომ ახლა როცა გაგვიჭირდა სახელმწიფო გვერდით უნდა დაგვდგომოდა. მიუხედავად ამისა, საშემოსავლოს ნაწილი დღესაც გვადევს როგორც დავალიანება და ინკასო. შესაბამისად, კომპანიების არც თუ მცირე ნაწილი იურიდიულად გაჩერებულია
ეს ვერ იქნება შვება სექტორისთვის, თუმცა სავარუადოდ, ეს არის დაწერილი ქულები სასტუმროების მფლობელებთან. ჩვენ სექტორს, რომლებსაც ჩამოგვყავს ხალხი და ვართ ერთ-ერთი პირველი უცხოური ვალუტის შემომტანი ქვეყანაში, არ გვეხმარება არაფრით. ალბათ პიარული ნაბიჯია, თითქოს ტურისტულ სექტორს მხარში დაუდგნენ. სინამდვილეში, ტურისტულ სექტორს მხარში არავინ დადგომია. ჩვენით მოვახერხეთ გადარჩენა“, - აცხადებს ჯაფარიძე.
მისი თქმით, ახლა ტურისტული სფერო სრულად გაჩერებულია და ცვლილება ომის დამთავრებამდე მოსალოდნელი არ არის.
„ახლა ბიზნესი დგას ურთულესი გამოწვევის წინაშე. გასულ წელს ვერც შევადარებთ იმდენად ცუდი სიტუაციაა. როგორც კი რუსეთის აგრესია დაიწყო, უკრაინაში მომენტალურად ყველა ჯავშანი გაუქმდა და ახალი ჯავშნები არ კეთდება. გამოსავლის ძიება ახლა უშედეგოა. სანამ ომი დამთავრდება, აქ რუსების გარდა არავინ ჩამოვა. საერთოდ არ ვიცი ამ ვადით ჩამოსული ადამიანები ტურისტებად რატომ ითვლებიან. შეგიძლიათ ნახოთ გუდაურში არავინ არის, ტურისტული ობიექტები ცარიელია. თბილისის გარდა სხვა ქალაქებშიც არ არიან უცხოელები. ჩვენი კოლეგები, მეგობრები, ხალხი რომლებთანაც წლებია მოვდივართ, ყველა გაჩერებულია“ - განაცხადა ცოტნე ჯაფარიძემ ,,საქმეში“.
შეგახსენებთ, პრემიერ-მინისტრის, ირაკლი ღარიბაშვილის განცხადებით, საქართველოს ტურისტული სექტორი 2021 წლის ქონების გადასახადს აღარ გადაიხდის. ინიციატივა გუშინ გახდა ცნობილი.
ცოტნე ჯაფარიძე
