საქართველოს  ეკონომიკაში ინვესტიციების არნახული ზრდაა. ციფრებთან ერთად, ტენდენცია ყურადღებას იქცევს იმითაც, რომ რეალური სექტორის დაფინანსება გაიზარდა და ფინანსურ სფეროს გადაასწრო. პირველ ადგილზე ამ მხრივ ენერგეტიკაა, რაც ბოლო წლების განმავლობაში პირველადაა.

საინვესტიციო ბაზარზე ცვლილებას სტატისტიკოსი სოსო არჩვაძე ეკონომიკის განვითარების წინაპირობად მიიჩნევს და დასძენს, რომ ქვეყანა დიდ სარგებელს განსაკუთრებით გრძელვადიან პერიოდში მიიღებს.

,,ინვესტიციებში რამდენიმე მომენტს გამოვყოფდი: პირველ რიგში, მთავარია, რომ გარკვეულწილად იგრძნობა ვექტორის გადახრა რეალური სექტორისკენ, როგორიცაა ენერგეტიკა, ტრანსპორტი, კავშირგაბმულობა და სხვა, სადაც ინვესტიციების მოცულობა მზარდია. მარტო ენერგეტიკაში ინვესტიციები 2-ჯერ მეტია, ვიდრე საფინანსო სექტორში.  ეს მაშინ, როცა წლების განმავლობაში საფინანსო სფერო ამ მხრივ ერთ-ერთ პირველ ადგილზე იყო. როგორც იქნა, იწამეს რეალურ სექტორში ინვესტიციების ეფექტიანობა, ეკონომიკის მდგრადობა გარე გამოწვევებთან, რაც უაღრესად პოზიტიური ფაქტორია.  შესაბამისად, როცა ინვესტიციების ხორციელდება უკუგების პერიოდი საკმაოდ გრძელვადიანია და აშკარად მიგვანიშნებს, რომ ქვეყნის მომავალს ინვესტორები პოზიტიურად უყურებენ“, - აცხადებს სოსო არჩვაძე ,,კომერსანტთან“.

მისი თქმით, ინვესტიციები მიმზიდველია ქვეყნების მიხედვითაც, რაც ასევე გრძელვადიან პერიოდში საქართველოს ეკონომიკის ერთ-ერთ მთავარ განმსაზღვრელ ფაქტორად უნდა იქცეს.

,,ევროკავშირის წილი ინვესტიციებში გაზრდილია და 2-ჯერ და მეტადაც აღემატება იგივე ევროკავშირის წილს საქართველოს იმპორტში. ადგილი აქვს ასევე რეინვესტირებას,  საქართველოში მოქმედი კაპიტალი იმდენად მომძლავრდა, რომ ადრე აღებული  ვალდებულებების გასტუმრება დაიწყო. მნიშვნელოვანია, რომ ეს მოხერხდა მშვიდობიანობის პერიოდში,  ხოლო ინვესტიციების ერთ-ერთი პირობა სტაბილური გარემო და განვითარების პერსპექტივაა. არა მარტო ჩინეთიდან, ინვესტიციები გაიზარდა აშშ-დანაც, მოხდა ბაზრების დივერსიფიცირება, რის შედეგსაც   ფაქტობრივად ყველა მიმართულებით ვიგრძნობთ. მთავარია, რომ  ინვესტიციებისთვის ყველა კარგი გახსნილია“, - დასძენს სოსო არჩვაძე.

ცნობისთვის, პირდაპირი უცხოური ინვესტიციების მოცულობა 2022 წლის I კვარტალში გასული წლის ანალოგიურ პერიოდთან შედარებით 330%-ით $568 მლნ-მდე გაიზარდა, რაც პირველი კვარტლისთვის რეკორდული მაჩვენებელია. საქსტატის განმარტებით აღნიშნული რეინვესტირებისა და სააქციო კაპიტალის ზრდით იყო გამოწვეული.

სფეროების მიხედვით $236 მლნ-ით პირველ ადგილზე ენერგეტიკაა, $111 მლნ-ით მეორეზე საფინანსო სექტორი, $81 მლნ-ით მესამე ადგილს უძრავი ქონება იკავებს. ინვესტიციის მოცულობამ $10 მლნ-ს ტრანსპორტის, კავშირგაბმულობის დამამუშავებელი მრეწველობისა და ჰორეკა სექტორშიც გადააჭარბა.

ინვესტორ ქვეყნებს შორის $196 მლნ-ით პირველ ადგილზე ესპანეთია, რისი მიზეზიც ესპანური კომპანიის მიერ GWP-ს საკონტროლო პაკეტის შეძენა გახდა. $87 მლნ-ით მეორე ადგილზე ბრიტანეთია, სამეულს $67 მლნ-ით თურქეთი ასრულებს. $10 მლნ-ზე მეტი ინვესტიცია შემოვიდა აგრეთვე: ჩინეთიდან, ნიდერლანდებიდან, შეერთებული შტატებიდან, მარშლის კუნძულებიდან და მალტიდან.

მარი ჩიტაია