პირველად ისტორიაში, ადამიანის მიერ შექმნილი ხომალდი მზესთან წარმოუდგენლად ახლოს მივიდა და მასთან კონტაქტი დაამყარა.

2021 წლის 28 აპრილს, NASA-ს პარკერის მზის ზონდი მზის ატმოსფეროს ზედა ნაწილში, გვირგვინში (კორონა) ჩაეშვა და მასში გაიფრინა. მაღალტექნოლოგიური სიცხისგან დამცავი ფარის წყალობით ის არა მხოლოდ გადარჩა, არამედ ადგილზე ჩაატარა გაზომვები და ჯერ არნახული მონაცემები მოგვაწოდა მზის სისტემის გულის შესახებ.

„პარკერის მზის ზონდის „მზესთან შეხება“ მონუმენტური მომენტი და ნამდვილად გამორჩეული მიღწევაა მზის მეცნიერებაში. ამ საეტაპო მიღწევამ მოგვაწოდა ღრმა მონაცემები ჩვენი მზის ევოლუციისა და მზის სისტემაზე გავლენის შესახებ; ყველაფერი, რასაც ჩვენი ვარსკვლავის შესახებ ვსწავლობთ, უფრო მეტს გვასწავლის სამყაროს დანარჩენ ვარსკვლავთა შესახებ“, — ამბობს NASA-ს სამეცნიერო მისიათა დირექტორატის ასოცირებული ადმინისტრატორი თომას ზურბუკენი.

პარკერის მზის ზონდი 2018 წელს გაუშვეს და მისი მთავარი მიზანი მზის გვირგვინის, იგივე კორონას შესწავლაა. 7-წლიანი მისიის განმავლობაში, ის 26-ჯერ მივა მზესთან ზედმეტად ახლოს, ანუ პერიფელიონში, რისთვისაც ჯამში ვენერასგან გრავიტაციული დახმარების შვიდ მანევრს განახორციელებს, რათა სულ უფრო და უფრო ახლოს მივიდეს. აპრილში მან მერვე მისვლა განახორციელა, რომელიც პირველი იყო, როდესაც ის გვირგვინში ნამდვილად შევიდა.

მზის ატმოსფეროში ყოფნის ხუთი საათის განმავლობაში, პარკერმა გაზომა მზის მაგნიტური ველის რყევები და ნაწილაკთა ნიმუშებიც აიღო. აქამდე, ჩვენი შეფასებები ამ მახასიათებელთა შესახებ, მხოლოდ გარე ინფორმაციას ეფუძნებოდა.

„მზესთან ასე ახლოს ჩაფრენით, პარკერმა შეიგრძნო მზის ატმოსფეროს მაგნიტურად დომინირებული შრის, გვირგვინის გარემო პირობები, რაც აქამდე არასოდეს გაგვიკეთებია“, — ამბობს პროექტის მეცნიერი, ასტროფიზიკოსი ნურ რაუაფი.

მისი განცხადებით, მაგნიტური ველის მონაცემებში ჩანს გვირგვინში ყოფნის მტკიცებულებები, მზის ქარის მონაცემები და ვიზუალური გამოსახულებები. ჩანს ხომალდის ფრენა გვირგვინის სტრუქტურებში, რომლებზე დაკვირვებაც აქამდე მხოლოდ მზის სრული დაბნელებისას შეგვეძლო.

1tv.ge