იტალიის ქალაქ რიმინიში, თანამედროვე ტექნოლოგიების გამოფენა Ecomondo-ზე, ქართულმა კომპანია „ტენემ“ პირველი ქართული „უკუ-ვენდინგ“ აპარატი წარმოადგინა, რომელიც ბოთლებს ჩაიბარებს და სანაცვლოდ დაგროვების ბარათზე ავტომატურად ქულებს დარიცხავს და ტელეფონს დატენის. დარიცხული ქულებით მომხმარებელი სხვადასხვა ნივთების შეძენას და ფასდაკლებებით სარგებლობას შეძლებს.
„ბოთლის „უკუ-ვენდინგ“ აპარატთან დაკავშირებით, მოლაპარაკება მაქვს იტალიურ კომპანია Daint-თან, თუმცა პარალელურ რეჟიმში მივმართე ქართულ ტექნოლოგიურ კომპანია Edison-ს, რომელმაც უფრო საინტერესო შემოთავაზება გაგვიკეთა, როგორც ტექნოლოგიურად, ისევე ღირებულებით.
ედისონის შემოთავაზებული ტექნოლოგიის მიხედვით ქართული წარმოების „უკუ-ვენდინგ“ მანქანა შეძლებს პლასტმასის ბოთლების ჩაბარებას, სანაცვლოდ კი მომხმარებელს საშუალებას მისცემს დატენოს ტელეფონი და ასევე მის პირად ბარათზე ქულები დარიცხოს, რომლითაც ის Ginventor-ის პროდუქციის შეძენას შეძლებს. სამომავლოდ არ გამოვრიცხავთ, რომ მომხმარებელი ბოთლების სანაცვლოდ თანხის აღებასაც შეძლებს,“ — განაცხადა „ტენეს“ დამფუძნებელმა სანდრო ლილუაშვილმა „კომერსანტთან“ საუბრისას.
„პირველი ქართული „უკუ-ვენდინგ“ აპარატი მომდევნო წლის დასაწყისში იქნება მზად. აქედან რამდენიმე სადემონსტრაციო მოდელი თბილისის სავაჭრო ობიექტებში დაიდგმება, ხოლო დანარაჩენებს იმ მსხვილ კომპანიებს შევთავაზებთ, რომლებსაც მწარმოებლის გაფართოებული ვალდებულების კანონი, უახლოს მომავალში, ბოთლების შეგროვება-სეპარირება-რეციკლირებას დაავალდებულებს“,— განაცხადა „ტენეს“ დამფუძნებელმა.
სანდრო ლილუაშვილი თანამედროვე ტექნოლოგიების გამოფენაზე თავად Ecomondo-ს მოწვევით მოხვდა, ბევრ სიახლეს გაეცნო და სამომავლოდ მათ დანერგვას საქართველოშიც აპირებს. ესენია: პლასტმასას ბოთლისგან ძაფის დამზადება, გადამუშავებული ტანსაცმლისგან საყოფაცხოვრებო ნივთების დამზადება და გადამუშავებული პლასტმასასგან სამშენებლო ბლოკის დამზადება.
მოამზადა მაკა ბიბილაშვილმა