საერთაშორისო საკრუიზო კომპანია Life at Sea Cruises-ი ტურისტებს 7 კონტინენტზე 3-წლიან კრუიზს სთავაზობს.

The Independent-ის ცნობით, ტური 7 კონტინენტის 135 ქვეყანაში 375 პორტს მოიცავს. კრუიზის დროს ტურისტებს შეეძლებათ მსოფლიოს 14 საოცრებიდან 13-ის მონახულების საშუალება ექნებათ. ღამის დაახლოებით მესამედს ხმელეთზე სასტუმროებში გაატარებენ, დანარჩენს ზღვაში.

კრუიზის ღირებულება წელიწადში 29 999 აშშ დოლარიდან დაიწყება, ანუ სამწლიანი ტური თითქმის 90 000 დოლარი დაჯდება.

კრუიზს განახორციელებს საკრუიზო გემი MV Gemini, რომელსაც 400 სალონი აქვს და 1074 მგზავრს იტევს. რეისი სტამბოლიდან 2023 წლის 1 ნოემბერს გავა.

კრუიზის ორგანიზატორები აცხადებენ, რომ ტური იდეალური იქნება „ციფრული მომთაბარეებისთვის“, რომლებსაც შესაძლებლობა ექნებათ იმოგზაურონ მსოფლიოში, იმავდროულად იმუშაონ ონლაინ და ამ ყველაფერში დღეში 80 დოლარზე ცოტა ნაკლები „ქირის“ გადახდა მოუწევთ.

აღსანიშნავია, რომ ტურის ფასში შედის: საკვები და ალკოჰოლი სადილის დროს, ველნეს-ცენტრი, მზის ტერასა და აუზი, მაღალსიჩქარიანი ინტერნეტი, გართობა და დასუფთავების მომსახურება. გემს ასევე ექნება 24-საათიანი საავადმყოფო ექიმთან უფასო ვიზიტით. ასევე, ტურის მონაწილეებისთვის ხელმისაწვდომი იქნება საბორტო ბიზნეს-ცენტრი, რომელიც მოიცავს შეხვედრების ოთახებს, 14 ოფისს, ლაუნჯს და ბიზნეს-ბიბლიოთეკას.