პირველად საქართველოში, კომპანია „გრინნეტმა“ თანამგზავრული ინტერნეტის პროგრამა Starlink-ი ჩამოიტანა, - აღნიშნულის შესახებ ინფორმაციას “ნავიგატორი” ავრცელებს. გამოცემის ცნობით, საქართველოში ორი Starlink-ი SpaceX-თან შეთანხმებით ჩამოიტანეს.

ჩვენს კომპანიას ერთ-ერთი ოფისი უკრაინაში აქვს. ომის დასაწყისში ჩვენს იქაურ კლიენტებს, სახელმწიფო სტრუქტურებს ინტერნეტის წვდომასთან დაკავშირებით პრობლემები შეექმნათ: რუსეთის ძალები საკომუნიკაციო ინფრასტრუქტურას ბომბავდნენ და ანადგურებდნენ. მას შემდეგ, რაც ილონ მასკმა გამოაცხადა, რომ უკრაინას საუკეთესო Starlink-ებს აჩუქებდა, დადგა საკითხი, რომ ქვეყნის სახელმწიფო მთავრობისთვის მეტი Starlink-ი გვეშოვა. ჩვენმა კომპანიამ ეს მოახერხა: უკრაინაში ორასამდე Starlink-ი ჩავიტანეთ. აქედან 100 ცალი უკრაინის მთავრობას ვაჩუქეთ. დანარჩენები პროექტებისთვის გავანაწილეთ. ორი ცალი კი საქართველოში ჩამოვიტანეთ. ბუნებრივია, SpaceX-მა ამის შესახებ ოფიციალურად ყველაფერი იცის“, - განაცხადა „გრინნეტის“ ბიზნესის განვითარების დირექტორმა დავით ბოლქვაძემ.

როგორც ბოლქვაძე ამბობს, Starlink-ის სერვისი საქართველოში ჯერჯერობით ოფიციალურად არ გააქტიურებულა.

„საქართველოში საკმაოდ დიდი გამოწვევებია, განსაკუთრებით ქვეყნის რეგიონებში. ბევრ კომპანიას და ორგანიზაციას, სჭირდება სწრაფი ინტერნეტი, იმისთვის რომ თავიანთი საქმიანობა უფრო ეფექტურად შეასრულონ. ეს შეიძლება სამაშველო სამსახური იყოს, ან სახანძრო, რომელიც ხანძარს აქრობს და კოორდინაციისთვის სწრაფი ინტერნეტი სჭირდებათ. შეიძლება მესაზღვრეებს დასჭირდეთ ან მოშორებულ სოფლებში იყოს საჭირო. Starlink-ი ამ პრობლემას ძალიან კარგად გადაჭრის.

Starlink-ის სერვისი საქართველოში ჯერჯერობით ოფიციალურად არ გააქტიურებულა, ჩვენ Starlink-თან შეთანხმება გვაქვს, რომ კონკრეტული კლიენტებისთვის და პროექტებისთვის სადემონსტრაციოდ და სატესტოდ გამოართვევინებდნენ. თუმცა ოფიციალურ ჯერ არ გაშვებულა. ზუსტი თარიღი ჯერ უცნობია, თუმცა სავარაუდოდ, მომავალი წლის დასაწყისში გაეშვება, რაც ოფიციალურად უკვე გამოცხადდა. Starlink-ის წარმომადგენელი რამდენჯერმე საქართველოში იყო, კომუნიკაციის კომისიასთანაც ჰქონდა ურთიერთობა“ – ამბობს დავით ბოლქვაძე „ნავიგატორთან“ საუბრისას.