რას წარმოადგენს საგადასახადო დავები, როგორია მდგომარეობა ამ მხრივ საქართველოში და დავების რაოდენობის გაზრდის ფონზე, რა ქმედითი ნაბიჯებია გადასადგმელი სახელმწიფოსგან — აღნიშნულ თემაზე რადიო „კომერსანტის“ ეთერში „გრანთ თორნთონ საქართველოს“ ვიცე მმართველმა პარტნიორმა პაატა შურღაიამ ისაუბრა.

მისი თქმით, საგადასახადო დავა მინი სასამართლო პროცესია, სადაც მონაწილეობს სახელმწიფო, როგორც დავის ერთ-ერთი ინიციატორი და გადასახადის გადამხდელი, რომელსაც ბიზნესის კეთების კუთხით გადასახადების გადახდის ნაწილში ჰქონდა სადაო. მას აღმასრულებელი ხელისუფლება მართავს, რომელიც შედის ფისკალურ პოლიტიკაში და მისი განმკარგავი არის ფინანსთა სამინისტრო.

„დავების განხილვა რამდენიმე საფეხურს მოიცავს. I - დავები წარიმართება ჯერ შემოსავლების სამსახურში, II - ფინანსთა სამინისტროში და III - თუ რომელიმე მხარისთვის მისაღები გადაწყვეტილება არ არის მიღებული, დავა სასამართლოში გრძელდება.

წინა წლის სტატისტიკურ მონაცემების თანახმად, თითქმის გახუთმაგებულია დავების რაოდენობა. მაგალითად, 3000-ზე მეტი დავის განხილვა მოხდა წინა წელს. 80-მდე შეხვედრა იყო ადმინისტრირების კუთხით და სადავო დავის მოცულობა იყო 2 მლრდ ლარი. ეს ჩვენი ბიუჯეტის თითქმის 10%-ს წარმოადგენს. ეს თანხა დიდია ჩვენი კალიბრის ქვეყნისთვის. სადაო თანხა წინა წლებში ნახევარი მილიარდი ლარი იყო და 4-ჯერ გაიზარდა, 5-6-ჯერ გაიზარდა სადაო თემაც“, - განაცხადა პაატა შურღაიამ.

მისი თქმით,  დადებითი გადაწყვეტილებები 13-15%-მდეა, ანუ უმეტესობა ბიზნესის საკეთილდღეოდ არ არის მიღებული. როგორც პაატა შურღაიამ განაცხადა, ამ საკითხთან მიმართებაში, წინა მინისტრების დროს, იყო მცდელობები, რომ ცვლილებები განხორციელებულიყო, მაგრამ არსებითი არაფერი გაკეთებულა. მისი თქმით, ამისთვის პოლიტიკური ნებაა საჭირო.

„2020 წელს ეკონომიკური მმართველობის პროგრამის ფარგლებში USAID-ის გრანტის ეგიდით მოხდა პროექტის შემუშავება. შეგვიძლია დავასკვნათ, რომ ამ პროექტს განხორციელება არ უწერია იმიტომ, რომ თითქმის 3 წელი გავიდა და შესაბამის მხარეებთან ამ საკითხის განხილვა არ მომხდარა.

ჩვენი მხრიდან ამ საკითხის ლობირება მიზნად ისახავს იმას, რომ 13-მდე საგადასახადო დავის პროექტი გვქონდა გასული წლების მანძილზე და ზოგადად, კომერციული მიზნებისთვის და მართვის კუთხით, მნიშვნელოვან კომპონენტს წარმოადგენს დავების ნაწილი. გვინდა ისეთი ტიპის „სთეიკჰოლდერები“, როგორიც არის სახელმწიფო, ბიზნესი, პროფესიონალები, გავაერთიანოთ და ამ თემის დაძვრა და აქტუალიზაცია მოვახდინოთ და USAID-ის პროექტიც - „კარგი ეკონომიკური მმართველობის“ ფარგლებში, მოვიკითხოთ.

მიმდინარე წელს ვაპირებთ, რომ სარეკომენდაციო ხასიათით შემოვიფარგლოთ, ჩავრთოთ ბიზნეს-ასოციაციები და გვინდა რომ მთავრობასთან, არა როგორც კრიტიკული და ნეგატიური და ოპოზიციურად განწყობილი საზოგადოება მივიდეთ, არამედ როგორც უფასო რესურსი, რომელსაც შესაბამისი ცოდნა და გამოცილება გააჩნია ბიზნესისა და საინვესტიციო კუთხით.

ჩემი და ჩემი კომპანიის შეხედულებით, საგადასახადო დავების მიმართულება და დავების საბჭო არის ერთ-ერთი ყველაზე აქტუალური საკითხი, რომელსაც  ფინანსთა სამინისტრო ახორციელებს. აქედან გამომდინარე, გარდა პოლიტიკური ნებისა, სხვა მექანიზმები არ არის დარჩენილი და ყოველდღიურად იმიტომ ვძრავთ ამ საკითხს, რომ პოლიტიკური ნება იყოს მიღებული და არ მინდა დავუშვა, რომ სახელმწიფოს არ აქვს სურვილი და ეკონომიკური პოლიტიკა იმისა, რომ გადაწყვეტილებები მიიღოს და არსებული მექანიზმი მთლიანად შეცვალოს“, - განაცხადა პაატა შურღაიამ.