პოლონეთი მსოფლიო გამოფენა „ექსპო 2030“-ის პრეტენდენტთა სიიდან რუსეთის ამოღებას დაჟინებით მოითხოვს. ამის შესახებ პოლონეთის განვითარებისა და ტექნოლოგიების მინისტრ ვალდემარ ბუდამ განაცხადა, რასაც „რია ნოვოსტი“ ავრცელებს.
2021 წლის აპრილში რუსეთმა „ექსპო 2030“-ის მოსკოვში მასპინძლობის უფლება მოითხოვა, ხოლო რუსული განაცხადის გამარჯვების შემთხვევაში, გამოფენა რუსეთის დედაქალაქში 2030 წლის 27 აპრილიდან 27 ოქტომბრის ჩათვლით გაიმართება. ასევე, გავრცელდა ინფორმაცია, რომ 300 000-დან 800 000 კვადრატულ მეტრამდე ფართობის ექსპოკომპლექსი შესაძლოა, ახალ მოსკოვში, ვნუკოვოს აეროპორტის სიახლოვეს, თავისუფალ ტერიტორიაზე გაკეთდეს.
მოსკოვის გარდა, „ექსპო 2030“-ის მასპინძლობის უფლებისთვის რომი, სამხრეთ კორეის ბუსანი, ოდესა და საუდის არაბეთის ერ-რიადი იბრძვიან. გამარჯვებული ქალაქი, სავარაუდოდ, 2023 წლის ივნისში, გამოფენების საერთაშორისო ბიუროს წევრი ქვეყნების კენჭისყრის შედეგად გამოცხადდება.
ვალდემარ ბუდა ამბობს, რომ პოლონეთი აქტიურად მონაწილეობს „ექსპო 2030“-ის მასპინძლის არჩევაში. მინისტრის ცნობით, ყველაფერი იმაზე მიუთითებს, რომ რეალური კონკურენტები ოდესა და მოსკოვი იქნებიან და გამოფენის ორგანიზებისთვის ბრძოლა სწორედ ამ ორ ქალაქს შორის გაიმართება. სწორედ ამიტომ მოსკოვში გამოფენის გამართვა მთლიანად რომ გამოირიცხოს, პოლონეთს სურს, რუსეთი „ექსპო 2030“-ის კონკურსიდან ამოიღონ და მხოლოდ ოდესის, უკრაინის მიერ წარდგენილი განაცხადი განიხილონ.
პოლონელი მინისტრი შეშფოთებულია იმაზე, რომ, პარიზში საერთაშორისო გამოფენების ორგანიზაციამ დღეს როგორც მოსკოვის, ისე უკრაინის განაცხადი შეაჩერა.
„ეს გადაწყვეტილება ჩვენთვის მეტად გაუგებარია. პირიქით, ჩვენ უნდა გამოვრიცხოთ რუსეთი და მოსკოვი, ხოლო უკრაინასა და ოდესას შანსი მივცეთ,“ - აცხადებს ვალდემარ ბუდა.
მსოფლიო გამოფენა, „ექსპო“ ყველაზე დიდი საერთაშორისო გამოფენაა, რომელშიც 170-ზე მეტი ქვეყანა მონაწილეობს. ისინი ყოველ ხუთ წელიწადში მეცნიერების, ტექნოლოგიების, არქიტექტურისა და ხელოვნების სფეროში საუკეთესო მიღწევებს წარმოადგენენ.
პოლონეთი
