პოლონეთის ხელისუფლება კალინინგრადის საზღვარზე ბარიერის აშენებას განიხილავს, რომ უახლოეს კვირებში მოსალოდნელი აფრიკელი და აზიელი მიგრანტების ტალღა შეაჩეროს. ინფორმაციას Reuters პოლონეთის მთავრობის წყაროზე დაყრდნობით ავრცელებს.

სააგეტოს შეფასებით, ხელისუფლებას 2021 წლის მიგრაციული კრიზისის გამეორების ეშინია. მმართველი პარტიის გენერალური მდივნის, კრშიშტოფ სობოლევსკის განცხადებით, მთავრობას საზღვრის ამ მონაკვეთზე უსაფრთხოების გაძლიერება მოუწევს და განიხილება ისეთი სასაზღვრო ბარიერის აშენება, როგორიც ამჟამად პოლონეთ-ბელარუსის მონაკვეთზე არსებობს.

Reuters-თან საუბარში სობოლევსკიმ განმარტა, რომ ქვეყნის სასაზღვრო სამსახური პოლონეთ-ბელარუსიის საზღვარზე მიგრანტებს კვლავ აწყდება. მანამდე „როსავიაციამ“ გამოაცხადა, რომ კალინინგრადის ხრაბროვოს აეროპორტი 1-ლი ოქტომბრიდან „ღია ცის" რეჟიმს აწესებს, რაც უცხოურ ავიაკომპანიებს საშუალებას აძლევს, ფრენები კალინინგრადის მიმართულებით განახორციელონ. ამის გამო პოლონეთის ხელისუფლება კალინინგრადის საზღვარზე მიგრანტების ნაკადს უახლოეს კვირებში ელოდება, რადგან, როგორც კრშიშტოფ სობოლევსკი ამბობს, კალინინგრადის „ცა ღიაა“ თურქეთის, სირიისა და ბელარუსის თვითმფრინავებისთვის.

თავის მხრივ, კრემლში აცხადებენ, რომ რუსეთის საზღვარზე კედლის აშენებაში პოლონეთს ხელს არ შეუშლიან. ამის შესახებ განცხადება პუტინის პრესსპიკერმა, დიმიტრი პესკოვმა გააკეთა. კალინინგრადის ოლქის მთავრობის პრესსამსახურის ხელმძღვანელმა, დიმიტრი ლისკოვმა „რია ნოვოსტის“ თებერვალში განუცხადა, რომ რუსეთ-პოლონეთის საზღვარზე პოლონეთის მხრიდან არა, მაგრამ კალინინგრადის მხრიდან ღობე უკვე არსებობს.

პოლონეთმა 2021 წლის აგვისტოს ბოლოს გამოაცხადა, რომ ბელარუსის საზღვარზე 2,5 მეტრ სიმაღლის ღობის აშენებას აპირებს. მაშინ პოლონეთის ხელისუფლება ბელარუსს „ჰიბრიდულ ომში“ ადანაშაულებდა, რისი მიზანიც ევროპის დესტაბილიზაცია იყო. ამის საპასუხოდ ალექსანდრე ლუკაშენკო პოლონეთს საზღვარზე კონფლიქტის გაღვივებაში სდებდა ბრალს. ბელარუსის საზღვარზე ღობის მშენებლობა პოლონეთმა მიმდიდინარე წლის 1-ელ ოქტომბერს დაასრულა.

ბიზნესპრესნიუსი