დასრულებულია მილსადენის ყველაზე რთული მონაკვეთის მშენებლობა, რომლითაც პოლონეთი ნორვეგიიდან ბუნებრივ აირს მიიღებს. პროექტის საბოლოო დასრულება 2022 წლის ბოლოსთვის იგეგმება, ამის შესახებ Deutche Welle იუწყება.
გაზსადენის ამოქმედების შემდეგ პოლონეთი რუსულ ბუნებრივ აირზე საბოლოოდ უარის თქმას შეძლებს. გაზსადენის, Baltic Pipe-ის ყველაზე რთული ნაწილის, ბალტიის ზღვის მონაკვეთის მშენებლობა დასრულდა. მილსადენის ბოლო ნაწილის დასრულების შემდეგ დანია და პოლონეთი ერთმანეთს დაუკავშირდა. პროექტი გრაფიკის მიხედვით მიმდინარეობს.
მილსადენის გაყვანა ბალტიის ზღვაზე ზამთრის შტორმებამდე მოესწრო. ამის შემდეგ მისი სამშენებლო სამუშაოები უკვე ხმელეთზე გაგრძელდება, შესაბამისად გრაფიკის დარღვევის სერიოზული საფრთხე აღარ არსებობს.
მიუხედავად იმისა, რომ მედიაში უფრო ხშირად „ჩრდილოეთ ნაკადზე“ მიდის საუბარი, რომელიც, ასევე, ბალტიის ზღვის გავლით რუსეთს უშუალოდ გერმანიასთან დააკავშირებს, Baltic Pipe-ს პოლონეთის გაზის ბაზარზე სიტუაციის კარდინალური ცვლილება შეუძლია. პოლონეთი კი რუსული „გაზპრომის“ ბუნებრივი აირის ერთ-ერთი უმსხვილესი მომხმარებელია აღმოსავლეთ ევროპაში, მთელ ევროკავშირში კი ამ მაჩვენებლით მეექვსე ადგილს იკავებს გერმანიის, იტალიის, ავსტრიის, საფრანგეთისა და ნიდერლანდების შემდეგ.
Baltic Pipe-ით ყოველწლიურად 10 მლრდ კუბური მეტრის ბუნებრივი აირის ტრანსპორტირება იგეგმება. სწორედ ამდენს იღებდა პოლონეთი აქამდე რუსეთიდან ბელარუსის ტერიტორიის გავლით გაზსადენით „იამალი-ევროპა“. „გაზპრომთან“ კონტრაქტი 2022 წლის ბოლომდეა ხელმოწერილი და პოლონეთი მის გაგრძელებას აღარ აპირებს.
ექსპერტები არ გამორიცხავენ, რომ ამ შემთხვევაში საერთოდ კითხვის ქვეშ დადგეს „იამალი-ევროპის“ გაზსადენის ექსპლუატაციის მიზანშეწონილობის საკითხი. ეს სწორედ ის გაზსადენია, რომლის გადაკეტვით რამდენიმე კვირის წინ ბელარუსის ლიდერი ალექსანდრე ლუკაშენკო იმუქრებოდა.
ახლა კი ამ გაზსადენის გამოყენების აუცილებლობა შეიძლება გაქრეს. თუ პოლონეთი მილსადენით რუსულ გაზს აღარ მიიღებს, „გაზპრომი“ შეძლებს გერმანიას ბუნებრივი აირი პოლონეთის ნაცვლად „ჩრდილოეთ ნაკადით“ მიაწოდოს. ამ მილსადენის სერტიფიცირება გაჭიანურდა, თუმცა ექსპერტები ამ პროცესის დასრულებას 2022 წლის მაისისთვის ვარაუდობენ.
„იამალი-ევროპის“ გაზსადენის პოლონეთის მონაკვეთს კომპანია EuRoPol Gaz ფლობს, რომლის კაპიტალის ნახევარი „გაზპრომს“ ეკუთვნის. შესაბამისად, რუსული გაზის მონოპოლისტი კომპანიის ოპერირების გაჩერებაში დაინტერესებულია არ არის. Baltic Pipe-ის ამოქმედების შემდეგ ეს მონაკვეთი, შესაძლოა, დასავლეთიდან აღმოსავლეთით ნორვეგიული ბუნებრივი აირის სარეზერვო ტრანსპორტირებისთვის იყოს გამოყენებული.
ყველაფერი ეს მომავლის სცენარია. ამჟამად კი Gaz-System-ს, რომელიც ნორვეგია-პოლონეთის გაზსადენის მფლობელი კომპანიაა, რამდენიმე პრობლემის მოგვარება მოუწევს. აუცილებელია თავად პოლონეთში მილსადენის მშენებლობის დასრულება და დანიის მონაკვეთის პრობლემის გადაჭრა, სადაც ეკოლოგიური მოსაზრებებიდან გამომდინარე ხელისუფლებამ რამდენიმე მონაკვეთზე მილსადენის მშენებლობა შეაჩერა. ფირმა Energinet, რომელიც პოლონური Baltic Pipe-ის დანიური პარტნიორია, ამჟამად სამუშაოების გასაგრძელებლად ახალი ნებართვის მიღებას ცდილობს. ამასთანავე ეს ენერგეტიკული კომპანია აცხადებს, რომ 2022 წლის ოქტომბრისთვის ნებისმიერ შემთხვევაში პოლონეთი ნორვეგიულ ბუნებრივ აირს მიღებს, რისთვისაც დანიაში დღეს არსებული გაზსადენების ინფრასტრუქტურა იქნება გამოყენებული.
გაზსადენი Baltic Pipe ჩრდილოეთ ზღვაში, დანიის სანაპიროდან 110 კილომეტრში იწყება, სადაც ის ნორვეგია-გერმანიის მილსადენს, Europipe II-ს უერთდება. დანიის სანაპირომდე მილსადენის მშენებლობა ჯერ კიდევ 2021 წლის ზაფხულში დასრულდა.
ექსპერტები ვარაუდობენ, რომ რუსული „გაზპრომის“ მონოპოლია ევროპულ ბაზარზე მალე დასრულდება.
წყარო: pia.ge