პოლონეთის ხელისუფლებამ Novatek-ის შვილობილ კომპანიას, Novatek Green Energy-ს გაზის ინფრასტრუქტურის სახელმწიფო კომპანიებისთვის გადაცემა მოთხოვა. ამის შესახებ პოლონეთის მთავრობის პრესმდივანმა, პიოტრ მიულერმა დღეს განაცხადა, რასაც რუსული სამთავრობო სააგენტო ТАСС ავრცელებს.
როგორც ცნობილია, Novatek-ის დამფუძნებელი და გამგეობის თავმჯდომარე სანქცირებული ოლიგარქი, ლეონიდ მიხელსონია, რომელიც კომპანიაში 24.6%-იან წილს ფლობს. კომპანიის მოწილე კიდევ ერთი სანქცირებული რუსი მილიარდერი, გენადი ტიმჩენკოა. ის Novatek-ის 23,49%-ის მფლობელია. ამადენად, შვილობილი კომპანია, Novatek Green Energy პოლონეთის სანქციების სიაში მოხვდა, რის შემდეგაც ქვეყნის ნაწილს გაზის მიწოდება შეუწყდა, მთავრობამ კი მიწოდების აღდგენა სახელმწიფო კომპანიებს დაავალა.
პიოტრ მიულერის თქმით, სანქციების სიაში მოხვედრის შემდეგ Novatek-ს ქონების გაყინვის ზომა შეეხო. დღეს პრემიერ-მინისტრ მატეუშ მორავიეცკიმ, კრიზისების მართვის კანონის საფუძველზე, სახელმწიფო კომპანიებს PGNiG-ს, PSG-სა და Gaz-System-ს დაავალა, დაუყოვნებლივ მიაწოდონ გაზი იმ ქსელებს, რომელთა ფორმალური მფლობელი Novatek-ია.
ასევე, პრემიერ-მინისტრის ბრძანებით, Novatek, კრიზისების მართვის კანონის საფუძველზე, ვალდებულია, აღნიშნულ სახელმწიფო კომპანიებს განკარგულებაში გადასცეს არსებული ქსელები გაზის მიწოდების აღსადგენად იმ რაიონებისთვის, რომლებსაც მანამდე Novatek ემსახურებოდა.
„გადაწყვეტილება დაუყოვნებლივ უნდა აღსრულდეს. დღეიდან ეს კომპანიები იწყებენ ოპერირებას რეგიონებში ამ დანადგარების მათთვის გადაცემისა და მათი დაუყოვნებლივ, ხელახლა ამოქმედებისთვის. მთელი პროცესი რამდენიმე ათეულ საათში უნდა დასრულდეს,“ - აცხადებს მთავრობის პრესმდივანი.
მიულერის თქმით, „ეს ყველაფერი დამოკიდებულია იმაზე, იქნება თუ არა დაბრკოლებები Novatek-ისა და მისი თანამშრომლების მხრიდან, ხოლო თუ ასეთი წინააღმდეგობა იქნება, მაშინ, კრიზისების მართვის კანონის შესაბამისად, მთავრობა იძულებით საშუალებებს გამოიყენებს.“
26 აპრილს პოლონეთმა რუსეთისა და ბელარუსის წინააღმდეგ სანქციების სია გამოაქვეყნა, რომელშიც 50 სუბიექტი, მათ შორის 35 კომპანია და 15 ფიზიკური პირი შედის. სიაში არიან: Gazprom, Akron, Novatek, Severstal, PhosAgro, Beloil, Faberlik, Kaspersky, Kamaz, Wildberries, ასევე, რუსი ბიზნესმენები, ტატიანა ბაკალჩუკი, ოლეგ დერიპასკა, მიხაილ ფრიდმანი, მიხაილ გუცერიევი, ვიაჩესლავ კანტორი, ევგენი კასპერსკი, იგორ სეჩინი, ვიქტორ ვექსელბერგი და სხვები.
პოლონური სანქციები ამ კომპანიების ფინანსური აქტივებისა და ქონების გაყინვას ითვალისწინებს, ასევე, ტენდერებში მათ მონაწილეობას გამორიცხვას, ხოლო მეწარმეებს პოლონეთში შესვლაც აეკრძალათ.
27 აპრილს, პოლონეთის სანქციების სიაში მოხვედრის შემდეგ Novatek Green Energy-მა პოლონელ მომხმარებლებს თხევადი გაზის მიწოდება შეუწყვიტა. ამის გამო რამდენიმე ათეული პოლონური გმინა, ანუ მცირე ადმინისტრაციულ-ტერიტორიული ერთეული გაზმომარაგების გარეშე დარჩა.
პოლონეთი
