პოლონეთის რესპუბლიკის სეიმმა ერთხმად მიიღო რეზოლუცია და დაგმო „ომის დანაშაულები, კაცობრიობის წინააღმდეგ ჩადენილი დანაშაულები და გენოციდის აქტები“, რომელიც რუსეთმა უკრაინაში განახორციელა.
”პოლონეთის სეიმი მტკიცედ გმობს ძალადობის აქტებს, ომის დანაშაულებს, კაცობრიობის წინააღმდეგ ჩადენილ დანაშაულებს, გენოციდის აქტებს, ადამიანის უფლებათა სისტემურ დარღვევას და საერთაშორისო სამართლის სხვა დანაშაულებრივ დარღვევებს, რომლებიც ჩადენილია სუვერენული უკრაინის ტერიტორიაზე რუსეთის ფედერაციის შეიარაღებული ძალებისა და მათი მოკავშირეების მიერ, სამხედრო მეთაურების ბრძანებებითა და პრეზიდენტ ვლადიმერ პუტინის უშუალო ხელმძღვანელობით“, -აღნიშნულია პოლონელი კანონმდებლების მიერ მიღებულ რეზოლუციაში.
პოლონეთის საკანონმდებლო ორგანომ მოუწოდა თანამოაზრე ქვეყნებს მხარი დაუჭირონ „სამართალწარმოების დაწყებას გაეროს საერთაშორისო სასამართლოსა და სისხლის სამართლის საერთაშორისო სასამართლოს წინაშე“ და „იმოქმედონ საერთაშორისო ორგანიზაციების მეშვეობით“, რათა პუტინისა და სხვა რუსი ლიდერების პასუხისმგებლობა დადგეს.
რეზოლუციაში ნათქვამია, რომ „ამ დანაშაულების საჯაროდ ხელმისაწვდომი მტკიცებულებები“ საკმარისია იმისათვის, რომ „პოლონეთის სეიმმა და საერთაშორისო საზოგადოებამ ვლადიმერ პუტინი ომის დამნაშავედ გამოაცხადონ“.
პოლონელმა დეპუტატებმა ასევე მიმართეს დემოკრატიული ქვეყნების დეპუტატებს მთელ მსოფლიოში და ევროპარლამენტს, დაეწესებინათ „ყველაზე სერიოზული შედეგების მომტანი სანქციები“ რუსეთის ლიდერებისთვის.
იმავდროულად, სეიმმა დაადასტურა თავისი „ურყევი სოლიდარობა თავისუფალი უკრაინელი ხალხისა და უკრაინის დემოკრატიული სახელმწიფოს“ მიმართ.
ცნობისთვის, გასულ კვირას პოლონეთის იუსტიციის მინისტრმა ზბიგნევ ზიობრომ ჟურნალისტებს განუცხადა, რომ ქვეყნის პროკურორებმა 300-ზე მეტი მოწმის ჩვენება შეაგროვეს უკრაინაში რუსი დამპყრობლების მიერ ჩადენილი ომის დანაშაულების გამოძიების ფარგლებში.