პოლონეთმა და ბალტიის ქვეყნებმა ახალი გაზსადენი გახსნეს, რომელიც ჩრდილო-აღმოსავლეთ ევროკავშირს ბლოკის დანარჩენ ნაწილთან აკავშირებს, - ინფორმაციას “ფრანს-პრესი“ ავრცელებს.
გამოცემა წერს, რომ გაზსადენის გახსნა გადამწყვეტი ნაბიჯია რუსულ გაზზე დამოკიდებულების შესამცირებლად.
508 კმ სიგრძის მილსადენი, რომელიც პოლონეთისა და ლიეტუვის გაზის ქსელებს აკავშირებს, საბოლოოდ ორივე მიმართულებით წელიწადში დაახლოებით ორი მილიარდი კუბური მეტრი გაზის ტრანსპორტირებას შეძლებს. რეგიონში არსებული კავშირების წყალობით, ევროპის გაზსადენის ფართო ქსელზე წვდომა ლატვიას, ესტონეთსა და ფინეთსაც ექნებათ.
„დღეს ჩვენ ვხსნით ჩვენს ენერგეტიკულ დამოუკიდებლობას“, - განაცხადა ლიეტუვის პრეზიდენტმა გიტანას ნაუსედამ დედაქალაქ ვილნიუსთან გამართულ ცერემონიაზე.
„ეს არის პასუხი რუსეთის მხრიდან შანტაჟზე“, - განაცხადა პოლონეთის პრეზიდენტმა, ანდჟეი დუდამ.
შეგახსენებთ, პოლონეთმა განაცხადა, რომ მზად არის მთლიანად შეწყვიტოს რუსული გაზის იმპორტის, საჭიროების შემთხვევაში, ბალტიის ქვეყნებმა, ლიეტუვამ, ლატვიამ და ესტონეთმა გასული თვის ბოლოს ასევე განაცხადეს, რომ შეაჩერებენ რუსული გაზის იმპორტს და გამოიყენებენ თავიანთ რეზერვებს.
გაზსადენის მშენებლობა 500 მილიონი ევრო დაჯდა და ამ თანხის დიდი ნაწილი ევროკავშირმა დააფინანსა.
გაზსადენი
