პოლონეთში ახალი გაზსადენი, „ბალტიის მილსადენი“ გაიხსნა, რომლის საშუალებითაც ნორვეგიული გაზის, დანიის გავლით, ტრანსპორტირება მოხდება.
პოლონეთში გამართულ ცერემონიას პოლონეთის, დანიისა და ნორვეგიის ლიდერები დაესწრნენ.
ნორვეგიის ენერგეტიკის მინისტრმა ტერჯე ასლანდმა განაცხადა, რომ ეს არის „ევროპის რუსულ ენერგორესურსებზე დამოკიდებულებისგან გათავისუფლების გზის მნიშვნელოვანი ეტაპი“.
დანიის პრემიერ-მინისტრმა მეტე ფრედერიქსენმა კი განაცხადა, რომ მილსადენის ამუშავება გადამწყვეტი გეოპოლიტიკური ნაბიჯია.
”ყველაფერი უნდა გავაკეთოთ იმისთვის, რომ ენერგორესურსები, როგორც რუსული ძალაუფლების ინსტრუმენტი, მოვიშოროთ”, - აღნიშნა დანიის პრემიერმა.
მისი თქმით, რუსეთის პრეზიდენტი, ვლადიმირ პუტინი რუსულ ენერგორესურსებს იყენებს, როგორც იარაღს ევროპის დესტაბილიზაციისთვის.
„მას არ უნდა მივცეთ წარმატების მიღწევის საშუალება“, - აღნიშნა მეტე ფრედერიქსენმა.
პოლონეთის პრეზიდენტმა, ანჯეი დუდამ კი მილსადენს „პოლონური ოცნება“ უწოდა.