პოლონეთმა და ამერიკულმა კომპანია Westinghouse-მა, ქვეყანაში პირველი ატომური ელექტროსადგურის მშენებლობისთვის წინასწარ საპროექტო სამუშაოების შესახებ შეთანხმებას ხელი მოაწერეს. შეთანხმების ხელმოწერის ცერემონია ვარშავაში გაიმართა.
„დღევანდელი გადაწყვეტილება და შეთანხმება მოგვცემს საშუალებას ვიგრძნოთ თავი უსაფრთხოდ წლების განმავლობაში. ჩვენ უნდა ვიზრუნოთ პოლონეთის ენერგეტიკულ უსაფრთხოებაზე“, - განაცხადა პოლონეთის კლიმატისა და გარემოს დაცვის მინისტრმა ანა მოსკვამ.
მან აღნიშნა, რომ შემდეგი შეთანხმება პირველი პოლონური ატომური ელექტროსადგურის მშენებლობაზე მიმდინარე წლის პირველ ნახევარში გაფორმდება.
ვარაუდობენ, რომ 2033 წელს ამოქმედდება პირველი ბლოკი, რომელიც განთავსდება გდანსკის სანაპიროზე. მომდევნო ბლოკები აშენდება ყოველ ორ-სამ წელიწადში ერთხელ. მთელი ბირთვული პროგრამა კი მოიცავს ექვსი აგრეგატის მშენებლობას 9 გვტ-მდე სიმძლავრით.