პენსიებისა და სოციალური გასაცემლების საკითხი ჩვენს საზოგადოებაში მუდმივად აქტუალური თემაა. როგორც წესი პოლიტიკოსებისთვის საპენსიო ასაკის ელექტორატის გულის მოგება ნამდვილად მიმზიდველია ყველა არჩევნების წინ. თუმცა, აღნიშნულმა საკითხმა და კონკრეტულად საპენსიო სესხების ფასმა, მიმდინარე წელს განსაკუთრებული აქტუალობა შეიძინა.  

წელს პირველად ეს დაპირება, დაპირებას გასცდა და შეიქმნა პენსიების და სხვა სოციალური გასაცემლების დარიგების უზრუნველყოფის უწყებათაშორისი კომისია. კომისიის მუშაობა რომ გამჭვირვალე უნდა იყოს, ამაზე ყველა თანხმდება, თუმცა ამ დრომდე კომისიის მუშაობაში, არც თემით დაინტერესებული არასამთავრობო ორგანიზაციები ჩართულან და არც სპეციალისტები.

სწორედ აღნიშნულ თემასთან დაკავშირებით „ახალგაზრდა ფინანსისტთა და ბიზნესმენთა ასოციაცია -აფბამ“ განცხადება გაავრცელა და მზაობა გამოთქვა ჩაერთოს კომისიის მუშაობაში. აღნიშნულ საკითხთან დაკავშირებით, „კომერსანტი“ აფბა-ს ვიცე-პრეზიდენტს, პაატა ბაირახტარს დაუკავშირდა. როგორც ბაირახტარმა ჩვენთან საუბარში განაცხადა, უწყებათაშორის კომისიის მუშაობაში სპეციალისტებისა და დამოუკიდებელი ორგანიზაციების ჩართვა სასიცოცხლოდ მნიშვნელოვანია, რათა კომისიის მუშაობა იყოს სრულად გამჭვირვალე, საზოგადოება იყოს ინფორმირებული და ჩვენი საპენსიო ასაკის მოსახლეობა დაცული იყოს პოპულისტური და არაკომპეტენტური ნაბიჯებისგან.

„აფბამ აღნიშნულ საკითხთან დაკავშირებით ინტერესი პირველივე დღეს გამოთქვა, ვინაიდან საკითხი მეტად სენსიტიურია. ის ეხება ერთის მხრივ ჩვენი საზოგადოების უმნიშვნელოვანეს ნაწილს 800 000-მდე პენსიონერს და, მეორეს მხრივ ,ჩვენს საბანკო სექტორს.

სამწუხაროდ, ჩვენ საკითხის ჯერ კიდევ საკომიტეტო განხილვების დროს ენით აღუწერელი პოპულიზმისა და არაკვალიფიციური განცხადებების მომსწრენი გავხდით. გულწრფელად გეტყვით ისმოდა ისეთი განცხადებები, რომელიც ჩემთვის როგორც ეკონომისტისთვის შოკის მომგვრელი იყო. მესმის, რომ პოლიტიკოსებს საკუთარი პოლიტიკური დღის წესრიგი გააჩნიათ, თუმცა როგორც ზემოთ ვახსენე, არ უნდა დაგვავიწყდეს, რაზეა საუბარი.

 ჩვენ ვსაუბრობთ 800 000 პენსიონერზე, რომელთა ბედი მნიშვნელოვან წილად იქნება დამოკიდებული, სწორედ ზემოთ ხსენებული კომისიის გადაწყვეტილებაზე და ამ დროს თუ გავითვალისწინებთ ამ კომისიაში შემავალი პოლიტიკური ძალების ცოტახნის წინანდელ განცხადებებს, რომლებიც პოპულიზმსაც კი ცდებოდა და უბრალოდ წინააღმდეგობაშიც კი მოდიოდა ერთმანეთთან, ეს ჩვენთვის სერიოზულ რისკს წარმოადგენს. მით უფრო, როდესაც პრაქტიკულად პროცესი ამ ეტაპზე სრულიად გაუმჭვირვალედ მიმდინარეობს“,-აღნიშნავს ბაირახტარი.

ბაირახტარმა გამოსავლის გზებზეც ისაუბრა და აღნიშნა, რომ გამოსავალი ცალსახად საქმეზე ორიენტირებული მიდგომაა, რომელიც უნდა გამოიხატოს არა პოპულიზმით და, ზოგადად, ანტისაბანკო ნარატივთ, არამედ ჩვენს პენსიონერებზე ფოკუსირებულ გადაწყვეტილებებით.

„დღეს ჩვენ თუ შევხედავთ სიტუაციას, საკითხი ასეთია, პოლიტიკოსები რომლებიც ამ კომისიაში არიან შესულები, საუბრობენ მკვახე და ურაპატრიოტული ტრმინებით. მეორე საკითხია, რომ ეს ტერმინები და განცხადებები სრულად არის აცდენილი რეალობას და ორიენტირებულია მასებზე.

მაგალითად, როგორიც არის ის, რომ პენსიონერებს „ლიბერთი ბანკი“ ატყავებს და ა.შ. შემდეგ როგორც აღმოჩნდა, აღნიშნული ტიპის პროდუქტი (არაუზრუნველყოფილი სამომხმარებლო სესხი) ყველაზე დაბალ პროცენტში სწორედ ლიბერთი ბანკს ჰქონია. მაგრამ მთავარი აქ სხვა საკითხია, საქმე ისაა, რომ თავად ბანკიც თანახმაა, რომ ჩატარდეს ახალი ტენდერი.

სხვათა შორის იცით, რომ 2019 წელს მთავრობამ ჩაატარა საპენსიო მომსახურებასთან დაკავშირებული ბაზრის კვლევა. თუმცა, აღნიშნულ კვლევაში არცერთმა ბანკმა ინტერესი არ გამოხატა. რატომ ?! იმიტომ რომ არცერთ ბანკს არ გააჩნია საპენსიო მომსახურებისთვის საჭირო ინფრასტრუქტურა. ამით იმის თქმა მინდა, რომ ვიღაცის პოლიტიკურ ინტერესებს არ უნდა გადავაყოლოთ ჩვენი პენსიონერების ბედი და არ უნდა იქნას მიღებული, ისეთი გადაწყვეტილება, რომელმაც შეიძლება თუნდაც მიზერულად მაინც გააუარესოს ჩვენი პენსიონერების ყოველდღიურობა. ამის ერთადერთი საშუალება კი გამჭვირვალეობა და კომისიის მუშაობაში სპეციალისტების ჩართვაა“,-ამბობს ბაირახტარი.