თბილისის ცენტრში, 150 მეტრის სიმაღლეზე ახალი რეკლამა გამოჩნდა, რეკლამა, რომელმაც ბევრი ადამიანის ყურადღება მიიქცია. მიზეზი მარტივია, მისი დანახვა 20 კილომეტრის მანძილზეა შესაძლებელი. გახსნიდან ერთი წლის შემდეგ ტურისტული ატრაქციონი, საჰაერო ბურთი, რეკლამირებისთვის პრემიუმ კლასის სპორტული მანქანების კომპანია „Porsche“-მ გამოიყენა. კომერსანტის წყაროების ცნობით, ამ უნიკალურ რეკლამაში კომპანია თვეში დაახლოებით 8 000 ევროს იხდის. „Air balloon tbilisi“-ში ამბობენ, რომ ბიუჯეტი ინდივიდუალური და კონფიდენციურია, თუმცა გვითხრეს ის, რომ ცნობილ ბრენდთან კომპანიამ 6–თვიანი კონტრაქტი გააფორმა.

„პლატფორმა Porsche-მ აითვისა და 6 თვიანი კონტრაქტი გაფორმდა. რეალურად რეკლამით ძალიან ბევრი კომპანიაა დაინტერესებული, მსურველების რაოდენობა განსაკუთრებით მას შემდეგ გაიზარდა, რაც „Porsche“-ს რეკლამა საჰაერო ბურთზე ნახეს. თუმცა, ვერც ერთი კომპანიის რეკლამის განთავსება „Porsche“-ს გვერდით ვერ მოხდება. სარეკლამო პლატფორმასთან დაკავშირებული ბიუჯეტი ინდივიდუალური და კონფიდენციურია, თუმცა გეტყვით, რომ თანამშრომლობას პრემიალური კლასის კომპანიებთან ვარჩევთ. აღსანიშნავია, რომ ამ კონტრაქტის შემდეგ, ერთ წელზე ნაკლები ვადით პლატფორმის დაქირავება რთული ადამიანური და ტექნიკური სამუშაოების გამო მიზანშეწონილი აღარ იქნება“, – აცხადებენ „Air balloon tbilisi“-ში.

შეგახსენებთ, რომ საჰაერო ბურთი თბილისში პირველად გასულ წელს გამოჩნდა. პროექტი შ.პ.ს „ატრაქციონმა“ ფრანგ პარტნიორებთან ერთად განახორციელა. საჰაერო ბურთი 32 მეტრის სიმაღლისაა, ხოლო  ფრენის უმაღლესი წერტილი 150 მეტრს აღწევს. ტურისტულ ატრაქციონში 4 500 000 ლარის ინვესტიცია განხორციელდა.

ბაჩო ადამია