პორტუგალიამ შესაძლოა, „ოქროს ვიზების“ პროგრამა დახუროს, რომელიც მდიდარ უცხოელებს, ინვესტიციის სანაცვლოდ, ბინადრობის ნებართვას ანიჭებდა. ამის შესახებ ქვეყნის პრემიერ-მინისტრმა ანტონიუ კოშტამ ლისაბონში გამართულ Web Summit-ზე განაცხადა, რასაც Reuters ავრცელებს.

პრემიერის თქმით, პროგრამამ, რომელიც პორტუგალიაში 2012 წელს დაიწყო, თავისი ამოცანა უკვე შეასრულა და მთავრობა მოქმედ სავიზო პროგრამებს, მათ შორის „ოქროს ვიზებს,“ გადახედავს.

„პროგრამამ ალბათ, უკვე შეასრულა დავალება, რომელიც უნდა შეესრულებინა და ამ დროისთვის მისი შენარჩუნების არანაირი საფუძველი აღარ არსებობს,“ - აცხადებს ანტონიუ კოშტა.

მისი თქმით, ოფიციალური გადაწყვეტილება ანალიზის დასრულების შემდეგ გახდება ცნობილი.

Reuters წერს, რომ „ოქროს ვიზების“ საშუალებით პორტუგალიამ უცხოელებისგან 10 წლის განმავლობაში 6,5 მლრდ ევროს ინვესტიცია მიიზიდა, რისი უმეტესობაც უძრავ ქონებაში განხორციელდა. ეს ინვესტორები, ძირითადად, ჩინეთიდან, ბრაზილიიდან და სამხრეთ აფრიკიდან იყვნენ. წელს პორტუგალიამ ლისაბონში, პორტოში, ალგარვესა და სანაპიროზე ქონების შესაძენად ბინადრობის ნებართვების გაცემა შეწყვიტა, რომ ინვესტიციები დიდი ქალაქებიდან ნაკლებად განვითარებულ რაიონებში გადაეტანა. ამასთან, პორტუგალიამ გადაწყვიტა, ე.წ. ციფრული მომთაბარეების (Digital Nomad) ვიზა შემოეღო, რომელიც მაღალი შემოსავლისა და დისტანციური მუშაობის მქონე უცხოელებს ქვეყანაში ერთი წლით ცხოვრებისა და საქმიანობის ნებართვას ანიჭებდა.

პორტუგალიამ უკრაინის ომის დაწყებისთანავე, თებერვლის ბოლოს რუსებისგან „ოქროს ვიზებზე“ განაცხადების მიღება შეწყვიტა. პროგრამის დაწყებიდან იმ დრომდე რუსებს 431 „ოქროს ვიზა,“ მათ შორის შვიდი წელს ჰქონდათ მიღებული. თებერვლიდან პორტუგალიამ ამ ვიზებზე რუსებისგან ათი განაცხადი მიიღო და ყველა მათგანზე უარი განაცხადა.

მიმდინარე წლის თებერვალში „ოქროს“ სავიზო პროგრამა, ასევე, დიდმა ბრიტანეთმა დახურა, რის მიზეზადაც უკანონოდ მოპოვებული ფულის ქვეყანაში ჩაღვრის რისკები დასახელდა.

ბიზნესპრესნიუსი